1926 жыл. Ол кезде Тұрардың Одақ көлемінде қызметке араласып, аса маңызды істердің басында жүрген кезі. Соған қарамастан жаздың жадыраған бір күнінде Меркі тауының етегінде жайлауда аз уақыт демалысқа уақыт тапса керек. Сол кезде Әлібек Жұмағұлов деген меркілік азамат жол бастап, қайраткерді үш күн бойы алып жүріпті. Сол демалыс сәті Тұрарға ерекше ұнаса керек. Осы сапар барысында жол бастаушы Әлібекке өзі талай жыл пайдаланған портфель-планшетін сыйға тартады.

Әлібек бұл сыйды ерекше қуанышпен қабыл алып, ұзақ жылдар бойы құнды зат ретінде үйінде сақтап келген. Кейіннен бұл жәдігер Әлібектің немересі Айдар Әлімбаевтың қолына аманат ретінде түседі. Осыдан біраз жыл бұрын Айдар ақсақал аталған портфель-планшетті Меркі аудандық тарихи-өлкетану мұражайына тапсырады. Қазіргі таңда бұл құнды жәдігер музей төрінен ерекше орын алған. Музейді тамашалауға келгендер арасында осы жәдігерді іздейтіндер жеткілікті. Аудандық тарихи-өлкетану музейінің бөлім жетекшісі Айман Жүрсіналиева: «Осыдан 5 жыл бұрын Меркі аудандық тарихи-өлкетану музейінде Т.Рықұловтың 125 жылдығына арналған «Ұлы Тұран тарихының ұлы тұлғасы» атты танымдық іс-шара өткен болатын. Осы іс-шараға Меркі ауданының құрметті азаматтары, тарихшылар және №9 Меркі колледжінің студенттері қатысты.

Сол жиында мен «Рысқұлұлы Тұрар Әулиеата уезі Меркі жерінде 1916 жылғы ұлт азаттық көтерілістің ұйымдастырушысы және саяси басшысы» тақырыбында баяндама жасап, Мемлекет және қоғам қайраткері Т.Рысқұловтың Меркі жерінде өткен жастық шағы, өмірі мен ерлігін, қайраткерлігін насихаттаған едік. Осындай іс-шараны биыл тағы да ұйымдастырдық. Айдар Әлімбаев ақсақал құрметті қонағымыз болып, әсерлі естеліктер айтты. Т.Рысқұловтан қалған сыйлық портфель-планшет туралы айтқан әңгімесін меркілік жастар қызығып тыңдайды», – деді.

Айта кетсек, жоғарыда есімі айтылған Андас батыр ауылының тұрғыны, ардагер-ұстаз Айдар Әлімбаев белгілі композитор Сыдық Мұхамеджановтың жиені. Оның нағашысы туралы айтатын әңгімесі де өз алдына бір төбе.

Меркі ауданы