Ы. Дүкенұлы атындағы Тараз қалалық Мәдениет үйінде судья және сот қызметкерлерінің кәсіби мерекесіне арналған іс-шара барысында облыс әкімі Ербол Қарашөкеев осы саланың дамуына ерен еңбек сіңіріп, қоғамда заңдылықты нығайтуға үлес қосқан бірқатар азаматтарды марапаттады. Аймақ басшысы іс-шара барысында өз міндеттерін адал атқарып, ел Конституциясы мен заңдарына сәйкес бейтарап және әділ шешім қабылдайтын сала қызметкерлерінің жұмысына табыс тіледі.

– Мемлекет басшысы Қасым-Жомарт Тоқаевтың тапсырмасына сәйкес сот жүйесі ауқымды реформалар мен жаңғыртудың бірнеше кезеңінен өтті. Бұл процесс үздіксіз және заман талабына сай айқындала түсіп, судьялардың тәуелсіздігі күшейтілді. Мамандандырылған соттар мен аппеляция жұмысы қайта форматталды. Сот жүйесіне енгізілген виртуалды сот жобасы онлайн режимге көшіруге мүмкіндік берді. Біздің алдымызда сот жүйесін нығайту бойынша әлі де көптеген міндет тұр.

Адам құқықтары мен бостандықтарын тек жоғары санатты және әділ сот қана сенімді қорғай алады. Сондықтан, мемлекеттегі тұрақтылық пен сот жүйесіне деген қоғамның сенімі сіздердің кәсіби шеберліктеріңізге байланысты болмақ. Жалпы, облысымызда 126 судья қызмет атқарады. Судья – сот саласының тірегі. Бұл ретте өңірлік соттардың тәжірибесін ерекше атап өткім келеді. Билер кеңесі жоғары деңгейде ұйымдастырылуда. Бүгінде облыстық соттың өзіндік орны қалыптасты. Жергілікті билік пен соттың тығыз қарым-қатынаста болуы – әлеуметтік және еңбек проблемаларын заң аясында шешуге мүмкіндік береді. Халықтың сот жүйесіне деген сенімін арттыру – басты борышымыз. Өз міндеттеріне асқан жауапкершілікпен қарап, әділ және адал болғандарыңыз үшін сіздерге алғыс білдіре отырып, зор денсаулық, отбасыларыңызға амандық тілеймін. Сот төрелігі мен ашықтығын қамтамасыз етуде жетістіктерге жете беріңіздер, – деді Ербол Шырақпайұлы.

Сонымен қатар, іс-шара барысында Жамбыл облыстық сотының төрағасы Ербол Ахметжанов, облыс прокуроры Нұрғалым Әбдіров, сот әкімшілігінің облыс бойынша департаментінің басшысы Берік Құлтасов және Қазақстан Республикасы Мемлекеттік қызмет істері жөніндегі агенттігі облыс бойынша департаментінің басшысы Руслан Шарипов сөз сөйлеп, демократиялық қоғамда сот билігінің маңыздылығына кеңінен тоқталды. Бұдан кейін, елімізде әділ сот төрелігін қалыптастыру мен жетілдіру жолында қажырлы еңбек еткен сала мамандары мен сала ардагерлеріне құрмет көрсетілді. Марапатталғандардың бірі – сот әкімшілігі департаменті басшысының орынбасары Гузаль Турдыева. Оның айтуынша, қоғамдағы даулар мен жанжалдарды шешу үшін судьялардың бойынан жоғары білім, тәжірибе әрі мінсіз адами және тұлғалық қасиеттер табылуы тиіс.

– Сот жүйесі – бұл мемлекет пен азаматтардың конституциялық құқықтары сақталуының кепілі. Мемлекет басшысы Қасым-Жомарт Тоқаев «Барлық деңгейдегі соттар, шын мәнінде, тәуелсіз, ашық және кәсіби болмаса, заң үстемдігін қамтамасыз ету мүмкін емес. Мемлекет осыған орай ауқымды жұмыс жүргізуде», деген болатын. Жалпы, сот саласын дамыту, жұмысын тиімді әрі әділ ету үшін атқарылуға тиіс шаруалар аз емес. Оның үстіне, сот жүйесіне қойылар талап та қатаң. Ал, мемлекет атынан үкім, шешім шығару құзыры берілген судьялар әділ төрелікті дөп басуы аса маңызды, – дейді Гузаль Кахарджанқызы.

Есен ӨТЕУЛІ