Облыстық прокуратураның баспасөз қызметі мәлімдегендей, есепші мемлекет қазынасынан 7 миллион теңгені қолды еткен. Ол бұл әккі әрекетін іске асыру үшін мекеме басшысының ЭЦҚ кілтін заңсыз қолданған.

Қаратөбе аудандық соты өзіне сеніп тапсырылған мүлікті ірі мөлшерде жымқыру және талан-таражға салғаны үшін есепшіні 3 жыл 6 ай мерзімге бас бостандығынан айырды.

«Осы дерек бойынша аудан прокуратурасы Қылмыстық кодекстің 189-бабының 3-бөлігі 1-тармағымен (өзіне сеніп тапсырылған мүлікті ірі мөлшерде жымқыру және талан-таражға салу) сотқа дейінгі тергеп-тексеруді бастаған. Келген шығынның 1 млн астамын ғана қайтарған сотталушы сот процесінде жымқырған қаражатты құмар ойындарға жаратқанын айтты. Үкім заңды күшіне енген жоқ», - делінген хабарламада.