Клубтар арасындағы әлем чемпионатының жеңімпазы тағы да еуропалық команда. Қарт құрлықтың мықтысы, әлемнің «сен тұр, мен атайын» футболшылары топтасқан корольдік клуб «Реал Мадрид» өзінің теңдессіз ұжым екенін тағы бір мәрте дәлелдеді. Әр құрлықтың чемпиондары сынға түскен доданы испан командасы рейтингі жоғары болғандықтан аргентиналық «Сан Лоренсомен» бір қатарда жартылай финалдан бастады. Алдымен «Конкакаф» айма­ғының үздігі «Крус Асуль» командасын тас-талқан етіп жеңді. Есеп 4:0. Бұдан кейін ақтық сынға алқынбай шыққан, құрамында Криштиану Роналду, Гарет Бэйл, Хамес Родригес, Иско, Тони Кросс сынды шетінен шебер ойыншылар жиналған мадридтік команда финалда аргентиналық «Сан Лоренсомен» күш сынасты. Либертадорес кубогы жолында қарсыластарының барлығын дерлік қалпақпен ұрып алған Мессидің отандастары бұл матчта корольдік клубқа қарсы ешқандай қауқар көрсете алмады. Қорғаныста ғана емес, шабуылда да тамаша ойнай білетін қорғаушы Серхио Рамос ойынның отыз жетінші минутында Тони Кросстың әуелете берген пасын кәдесіне жаратты. Серхионың бағыттаған соққысын Себастьян Торрико қайтара алған жоқ. Бұдан кейін Криштиану Роналду өзінде болған мүмкіндікті пайдалана алған жоқ. «Реал» ойында түбегейлі басым­дыққа ие болғанымен, үзіліске дейін есеп өзгеріссіз қалды. Матчтың екінші кезеңі бастала салысымен іске кіріскен «Реал» ойыншылары елу бірінші минутта есепті еселеді. Иә, «Реалда» Роналду гол салмаса, Бензема мен Бэйлдің бірі мергендік танытатынына тағы да көз жетті. Орталық алаңда допты Тони Кросс Искоға асырды. Иско өз кезегінде әдемі ашылған Гарет Бейлге керемет пас шығарды. Бэйлдің сол аяқпен бағыттаған соққысы керемет шықты дей алмаймыз. Дегенмен, қақпашы Торриконың қателігі Бэйлдің кезекті мәрте гол авторы атануына мүмкіндік жасады. Бұдан кейін «Реал» ойыншылары асығып-аптыққан жоқ. Ойын бір қалыпты өрбіді. Корольдік клуб допқа көп иелік жасап, қарсыластарын әбден діңкелетті. Осылайша «Реал» барлық турнирді қоса есептегенде 22 ойында қатарынан жеңіске жетсе, Тони Кросс екі команданың сапында клубтар арасында әлем чемпионы атанған жалғыз футболшы болып тарихқа енді.

 Табиғат АБАИЛДАЕВ, «Ақ жол».