«Жаңармаған» рекорд қалды ма?

Осы екі футболшыны салыстыратын­дар көп. Лионель Месси төрт дүркін, Криштиану Роналду екі дүркін алтын доптың иегері. Биыл да осы екі футбол данышпандары алтын доптан басты үміткер. Чемпиондар лигасында Лионель Месси бірінші болып Рауль Гонсалес Бланконың рекордына түзету енгізді. Еншісінде 74 гол бар. Криштиану оны өкшелеп келеді. Ал, сол чемпиондар лигасында Криштиану Роналду бір маусымда 17 гол салып, Мессидің рекордын бұзғаны да есімізде. Ла лигада (Испания біріншілігі) көзін ашқалы өнер көрсетіп келе жатқан Лионель Месси жақында тағы бір рекордқа түзету енгізді. Ол осы біріншіліктің үздік бомбардирі саналған Тельмо Сарраның көрсеткішін еселеді. Футбол аңызы Сарраның еншісіне 251 (273 матчта) гол жазылса, Месси 291 ойында 256 голдың авторы атанып, көш тізгінін қолға алды. Леоның нәтижелілігі орташа есеппен әр матчқа 0,88 голдан келеді. Ла лигада бес-алты жылдың бедерінде доп теуіп келе жатқан Криштиану Роналду өзін бұл біріншілікке кештеу келгенімен қоймай, Мессиден қалар емес. Рон күні кеше «Сельтаға» қарсы матчта хет трик жасап, екі жүзінші голын салды. Роналду әзірге тоғызыншы орында тұр. Футбол әлемінде КриРо атанып кеткен португал жігітінің нәтижелілігі 1,12 голға тең (178 ойын, 200 гол). Бұл да бір рекорд. Жыл өткен сайын Мессиге қарағанда нәтижелі өнер көрсетіп келе жатқан Роналдуға тағы бір рекорд тиесілі. Ол 23 матчта хет трик жасады (бір ойында үш гол соқты!). Дәл қазіргі таңда ла лигада Криштиану Роналду өзі өткізген он үш ойында 23 гол авторы атанса (мұндай көрсеткіш ешкімде болмаған!), Лео Мессидің еншісінде 13 гол бар.

Биылғы жылдың басты сыйлығы алтын допқа кім лайықты екенін анықтайтын сауалнамада Роналдуға жанкүйерлердің басым бөлігі (70 пайызға жетеқабыл) дауыс берсе, бұл тізімде Месси екінші орында тұр. Роналду өткен жылы «Реалдың» сапында чемпиондар лигасын жеңіп алды. Ал, Месси «Барселонамен» ешқандай жетістікке жеткен жоқ. Қаңтар айында алтын доптың иегері анықталады... Қос футболшының бұзған рекордтары туралы ұзақ әңгімелеуге болады...