Болашағы жарқын балуан
Әулиеата топырағында күрзі жұдырықты жампоздар мен жауырыны жер иіскемеген балуандар жетерлік. Өзгесін айтпағанда, 60 келі салмақта өнер көрсететін Елдос Сметовтің дарынын мойындамайтын жан кемде-кем. Саңлақ спортшы бұған дейін дзюдодан олимпиада ойындарының екі дүркін жүлдегері атанып, әлем біріншілігінде үздік деп танылды. Бүгінде жеңіл салмақтың шын шеберінің ізбасарлары да жетерлік. Солардың бірегейі – Нұрқанат Серікбаев. Жиырма жастағы спортшының жеке бапкері – Қуат Қанаев. 14 жылдық тәжірибесі бар маман шәкіртінің болашағынан үлкен үміт күтетінін жасырмады. Бұл мақсатта күндіз-түні аянбай еңбек етіп, білгенін үйретуден де жалықпайды. Нәтижесінде, Нұрқанат биік белестерден көрініп үлгерді. Нақтылай түссек, 2019 жылы жасөспірімдер арасында өткен ел чемпионатында жеңімпаз атанса, дәл осы жылы Азия және Әлем біріншіліктерінде қарсыластарын қапыда қалдырды. Ал, 2021 жылы жастар арасында Азия чемпионатында І орынға лайық деп танылса, өткен жылы Азия біріншілігінде және Еуропа Кубогында жеңіс тұғырына көтерілді. Сондай-ақ, биыл ересектер арасында Ташкентте өткен жарыста жүлделі ІІ орынды қанжығаласа, Анталиядағы сайыста үздік үштікті түйіндеді.
– Нұрқанатты жаттықтырып жүргеніме 10 жылға жуықтады. Шәкіртім бұған дейін біраз белестерді бағындырып үлгерді. Десе де, бұған тоқмейілсуге болмайды. Өйткені, ел намысы сынға түсер дүбірлі додалар әлі алда. Осы мақсатқа жету үшін талмай еңбектенетін боламыз. Нұрқанат дәл қазір Анталияда оқу-жаттығу жұмыстарын жүргізіп жатыр. Жуық арада елге оралады. Содан соң, ұлттық құрамадағы қыз-жігіттермен бірге Шымкенттегі оқу-жаттығу лагеріне аттанады. Алдағы мамыр айында Катарда дзюдодан Әлем біріншілігі өтпек. Ел сүйетін Елдостай ағасының салмағында белдесетін шәкіртіме тек сәттілік тілеймін. Жарқын жеңістерімен бізді қуантады дегенге сенім мол, – дейді Қуат Қанаев.
Айта кетейік, биылғы жылдың 7-14 мамыр аралығында Катар елінің астанасы Доха қаласында дзюдодан Әлем чемпионатының жалауы желбіремек. Татами шеберлерінің басын қосқан айтулы жарыста ел құрамасының сапында 4 жерлесіміз өнер көрсетпек. Атап айтқанда, 60 келі салмақта Елдос Сметов пен Нұрқанат Серікбаев белдессе, Данияр Шамшаев (73кг) және Ғалымжан Қырықбай (+100кг) ел намысын қорғайтын болады.
Есен ӨТЕУЛІ
Ұқсас жаңалықтар
