Алтыннан алқа тағынды
«Тараз-Арена» спорт кешенінде Пара (мүмкіндігі шектеулілер) жүзуден жастар және жасөспірімдер арасында ел чемпионаты өтіп, онда жерлестеріміз сәтті өнер көрсетті. Атап айтқанда, 50 метрге арқамен жүзуден 7 кластар арасында алдына жан салмай, чемпион атанды. Осылайша, 12 жасар Әлібек Талғат болашағынан үміт күттірді. Ол суда жүзумен үш жылдан бері айналысып келеді. Енді міне, ізденісі өзінің оң нәтижесін беріп отыр. Атасы Талғат Жұмабек те немересіне жанкүйер болып келген. Немересінің жетістігіне қуанған ақсақал, алдағы уақытта да спортшыға мүмкіндік жасап отыратынын айтты.
Аталған чемпионаттың марапаттау рәсіміне суда жүзуден Паралимпиада және әлем чемпионы Зульфия Ғабидуллина қатысып, жеңімпаздарға қолдау білдірді.
Біз жасөспірім чемпионның жеке бапкері Елдос Әбілдаевты да сөзге тартқан едік. «Бұл жарысқа екі шәкіртімді әкелдім. Әлібек Талғат 7 класс, Дидар Қырықбай 8 класта өнер көрсетті. Екеуі де 50 метр қашықтыққа арқамен жүзді. Жасөспірімдер арасында Әлібек Диханұлы алтыннан алқа тағынса, жастар арасында Дидар Қырықбай күміске қол жеткізді. Менің мақсатым жүзеге асты. Енді жыл соңына дейін тағы 3-4 мәрте ел чемпионаты өтеді. Сол жарыстарда шәкірттерім осы деңгейінен түспеуі қажет. Сонда олар Пара жүзу спорты бойынша Ұлттық құрамаға алынады. Ол шәкірттерімнің мүмкіндігі молая түседі деген сөз. Бұйырса, Ұлттық құрамаға қабылдану жолында тер төгеміз», дейді Елдос Ерболұлы.
Есет ДОСАЛЫ
Ұқсас жаңалықтар
