Таразда бильярд ойынынан Әлем чемпионаты өтуде

Еліміздің бильярд спорты федерациясының ұйымдастыруымен Тараз шаһарында тұңғыш рет жалауы желбіреген әлемдік додаға төрткүл дүниенің 19 мемлекетінен «сен тұр, мен атайын» ойыншылар келді. Дода­ның ашылу салтанатында облыс әкімінің орынбасары Қалижан Әбдірайымов сөз алып, алғаш рет Тараз топырағында өтіп отырған бұл сынның үлкен абырой екенін атап өтті. Сонымен қатар додаға қатысушыларға сәттілік тіледі. Жарыстың ашылу салтанатында шет елдерден келген қонақтар да өз лебіздерін білдіріп, ұйымдастырушыларға, облыс басшылығына ризашылықтарын жеткізді.

Бильярдтың динамикалық пирамида деп аталатын түрі бойынша өтіп жатқан әлем біріншілігіне бір ғана Ресейдің өзінен Сергей Тузов, Никита Левада, Александр Чипиков сынды әлем чемпионатының чемпиондары мен жүлдегерлері қатысып жатыр. Сондай-ақ қырғыз елі де үкілеген үміттерін әкеліп отыр. Онымен қоса біздің облыстан да төрт бірдей тастаяқшы әлем біріншілігінде бақ сынауға белді бекем буыпты.

Табиғат АБаилдаев, «Ақ жол».