Жаңа түскен келіннің бетін ашқанда, беташар айтушы ақын оң қолына ұстаған жеміс ағашына немесе тобылғымен сапталған қамшының сабына қызыл торғын орамал байлап, сонымен ашады. Онысы – келіннің беті айдай жарық болсын, ұрпағы көп, жеміс ағашындай жемісті болсын дегені. * * * Жаңа түскен жас келін отқа сәлем бергенде: «От ана – Ұмай ана, жарылқа» деп тілек тілейді. Басқа әйелдер отқа май құйып, алақандарын қыздырып алып, келіннің бетін сипайды. Бұл – келіннің жүзі жылы болсын, дидары ыстық болсын, тіл-көз тимесін дегені.