НҰР-СҰЛТАН. ҚазАқпарат – Қазақстан биыл 180 мың тонна бензол мен параксилол экспорттайды. Бұл туралы бүгін Үкімет үйіндегі баспасөз мәслихатында ҚР Энергетика бірінші вице-министрі Махамбет Досмұхамбетов айтты, деп хабарлайды ҚазАқпарат тілшісі. Оның дерегінше, Атырау мұнай өңдеу зауытында осы жылдың 9 айы ішінде 107 мың тонна хош иісті көмірсутек (бензол, параксилол) өндірілді. Аталған өнім экспортқа бағдарланған. 2019 жылға арналған жоспар – 180 мың тонна. Сонымен қатар, осы жылдың тамыз айында Алматы облысында майлайтын май өндіретін зауыт пайдалануға берілген. Оның қуаты жылына 100 мың тоннаны құрайды. «Осы өндіріс ішкі нарықтың жағармайға деген қажеттілігін қамтамасыз етуге және жақын шетелге экспортты жүзеге асыруға мүмкіндік береді», - деді Махамбет Досмұхамбетов.