балаларға арналған үздік шығармаларға беріледі

Осы жылдың 20 сәуірінен бастап балаларға арналған үздік шығармалар арасында X халықаралық «Дарабоз» бәйгесі бастау алғаны туралы Алматыдағы Қазақстан баспасөз клубында өткен баспасөз мәслихатында мәлім етілді. Биылғы байқаудың басты ерекшелігі – қаламгерлер шығармаларын бұрынғыдай лақап атпен емес, өз аты-жөндерімен және екі тілде (қазақ, орыс), үш түрлі жанр (поэзия, проза, ертегілер) бойынша ұсына алады. Ақын-жазушыларды балалар тақырыбына тартуға «Бауыржан» қайырым­дылық қоры мен Қазақстан Жазушылар одағы тікелей ұйытқы болып, «ZHERSU» инвестициялық-өндірістік корпорациясы қаржылай демеу көрсетпек. Балаларға арналған шығарма­шылық байқаудың бас жүлдегері – 1 миллион теңге иеленсе, бірінші орын алған 2 үздік қаламгерге – 700 мың теңгеден, екінші орын алған 2 адамға – 300 мың теңге, үшінші орын алған 3 адамға – 200 мың теңгеден бұйырады. Жалпы, байқаудың жүлде қоры 6 миллионды құрайды. Жүлдегерлерден қалған қаражат жеңімпаз шығармаларды жинақ етіп шығаруға жұмсалып, бұл кітаптар мектептердің кітапханаларына тегін таратылмақ.

«Ақ жол-Ақпарат».