Мерекелік іс-шарада облыс әкімі Ербол Қарашөкеев әйелдер қауымын мейрамымен құттықтап, олардың қоғамдағы рөлі ерекше екеніне, облыстың дамуына қосып жүрген елеулі үлесіне айрықша тоқталып, құрмет көрсетті.

– Көктемнің алғашқы мерекелерінің бірі – Халықаралық әйелдер мейрамы қарсаңында өздеріңізбен кездесіп отырғаныма қуаныштымын. Бүгінгі кездесуге түрлі салада қызмет етіп, оның ішінде еңбек адамының жарқын үлгісін көрсетіп жүрген жұмысшы мамандық өкілдерінен құралған нәзікжандылар да қатысып отыр. Өздеріңізді және облыстағы барлық аналарымыз бен әжелерімізді, апа-қарындастарымызды Халықаралық әйелдер күнімен шын жүректен құттықтаймын. Бұл мереке, ең алдымен, аналарымызға деген шынайы құрметіміздің белгісі. Әр адам үшін ана ұғымы – ең қасиетті, ең қастерлі сөз. Себебі, ана – қоғамның тірегі, отбасының шуағы, береке-бірліктің шырақшысы. «Ананың басқан жерінде пейіш бар» деген даналық сөздің мағынасы өте тереңде жатыр, – деді Ербол Шырақпайұлы.

Биыл «Жұмысшы мамандықтары жылы» аясында елімізде еңбек адамдарына кең қолдау көрсетіліп келеді. Жиында қызылша шаруашылығының маманы, көпбалалы ана Хадиша Қадыралиева жиналғандарды мерекесімен құттықтап, нәзікжанды жұмысшы мамандық иелеріне көрсетілген құрмет үшін алғыс білдірді.

– Ана деген қастерлі сөзді естігенде тебіренбейтін жүрек, толқымайтын көңіл болмайды. Өйткені, ол бар тіршілік атауының бастауы. Осыны терең ұғынған ата-бабаларымыз қыз баласына ерекше көңіл бөліп, құрметтеген. Бұл дәстүр күні бүгінге дейін бұзылмай сақталып келеді. Бүгінде мемлекет тарапынан көпбалалы аналарға, ер азаматтармен иық тіресе қызмет етіп жүрген еңбек адамдарына кең көлемде қолдау қарастырылған. Мейрам қарсаңында әйелдер қауымын айрықша мерекесімен құттықтай отыра мемлекет тарапынан еңбек адамдарына көрсетіліп жатқан құрмет үшін алғысымды білдіремін, – деді Хадиша Қадыралиева.

Киелі Әулиеата жері қашан да асыл аналардың, атақты еңбек майталманы атанған аяулы арулардың мекені болған өңір. Көмейінен жыр төгілген ақын Ұлбике, Ұлы Жеңіс күнін жақындатқан соғыс ардагері Зоя Мамедова, аймақтың алға жылжуы үшін аянбай тер төккен еңбек ардагерлері – Лидия Ахметова, Нілзия Рахышева, Бәтес Егембердиева, Күләш Әбдікешова, Хадиша Оспановалар облыстың қоғамдық-саяси өмірінен тыс қалмай, жас ұрпақ тәрбиесіне атсалысып келеді. Сонымен бірге, өңір руханиятына өзіндік үлес қосқан Күләш Ахметова, Шырын Мамасерікова, Үміт Битенова, Ғайни Әлімбекқызы, Нұрсифат Салықова және Мәкен Рахымжановалар – біздің мақтанышымыз. Бұл қатарда қазақ спортының жарқын жұлдыздарын дүниеге әкелген Тоқтагүл Сметова секілді асыл аналар да бар. Мерекелік жиында Париж олимпиадасының чемпионы Елдос Сметовтің анасы Тоқтагүл Сметова да өз құттықтауын арнады.

– Бүгінгі келіп жеткен төл мерекемізбен барша әйелдер қауымын құттықтаймын. Шынында, қазақ әйелдері бүгінде отбасының берекесін ұйыстырып қана қоймай, қоғамдық- әлеуметтік өміріне белсене араласып келеді. Осы жиында өңірімізге белгілі әр саланың майталмандарымен бас қосып отырғаныма қуаныштымын. Мемлекет басшысының тарапынан көрсетілген қолдаулар нәтижесінде өткен жылы Елдос олимпиада чемпионы атанды. Ол жалғыз бір отбасының ғана емес, елдің баласы. Өздеріңіздің қалың қошеметтеріңіз бен қолдауларыңыздың арқасында осы жетістікке жетті, – деді Тоқтагүл Сметова.

Сонымен бірге, басқосуда облыстағы білім саласының ардагері Шарбан Желдібаева да сөз сөйлеп, әйел затының ұлт тәрбиесіндегі рөлінің маңыздылығына тоқталды. Жалпы, өңірдің білім саласындағы қызметкерлердің 75 пайызын, денсаулық сақтау саласында 85 пайызын және үкіметтік емес ұйымдарда жұмыс істейтіндердің үштен екісін әйелдер қауымы құрайды. Ал, кәсіпкерлік субъектілерінің жалпы санының 42 пайызын әйелдер басқарады.

Жиын соңында биыл облыста «Әулиеата – кітап оқитын өңір» жобасы бастау алғанын атап өткен аймақ басшысы мереке қарсаңында жарыққа шыққан жаңа кітаптарды таныстырып өтті. Атап айтқанда, басқосуда ақын Күләш Ахметованың «Қасиетті мекен» жыр жинағы мен өңірімізге белгілі алпыс үш тұлғаның аналары туралы естеліктері мен сұхбаттары жинақталған «Менің анам» кітабы, шығыстық шайырлар тізбегін жалғап, тараздық арулар мен аналарды жырға қосқан «Мөп-мөлдір көздің қарасын...» кітаптары таныстырылып, қалың көпшілікке жол тартты.

Нұрболат АМАНБЕК