Енді біреудің баласын қорқытқандарға, буллинг жасағандарға 10 айлық есептік көрсеткіш яғни, 37 мың теңгеге жуық айыппұл салынады. Ал буллинг, кибербуллинг бір жылда екінші рет қайталанса, онда айыппұл көлемі бірден үш есеге өседі. Демек, сес көрсеткен адам 110 мың теңгеден аса айыппұл төлеуге міндеттеледі. Мұндай әрекетке 12 мен 16 жастағы жасөспірімдер барса, онда айыппұл баланың ата-анасына салынады. Бұдан бөлек, баланы қоғамдық көліктен мәжбүрлі түрде шығарып жіберуге болмайды. Бұған да айыппұл қарастырылған. Көпшілік алдында немесе бұқаралық ақпарат құралдарын, әлеуметтік желілерді пайдалана отырып жасалған осындай әрекеттер кибербуллинг болып саналады. Сондықтан оған да айыппұл мөлшері бекітілген.

Осы орайда, жергілікті құзырлы орындар түсіндіру, алдын алу жұмыстарын жүйелі түрде жүргізуде.

– Оқу жылы қарсаңында полиция қызметкерлері жергілікті атқарушы органдармен және білім бөлімімен бірлесе отырып, 506 білім беру мекемесінің ата-аналар комитетімен 47 кездесу ұйымдастырды. Онда кәмелетке толмаған балаларды қадағалау және бақылау, буллинг, бұзақылық пен оның зардаптарының алдын алу тақырыптары талқыланды. Барлығы 12086 ата-ана қатысты. Іс-шара барысында сондай-ақ, ата-аналар мен оқушыларға жеке қауіпсіздік шараларын, жол қозғалысы ережелерін сақтау, құқық бұзушылықтың алдын алу бойынша 3,5 мыңнан астам ақпараттық буклеттер мен иллюстрациялық парақшалар таратылды, – деді жергілікті полиция қызметі басқармасы ювеналды полиция тобының ерекше тапсырмалар жөніндегі аға инспекторы Әлішер Қалышев.

Бұдан бөлек, жергілікті полиция қызметінің, білім бөлімінің, «Сенімен болашақ» республикалық қоғамдық бірлестігі Жамбыл филиалының бастамасымен ата-аналарға арналған «Үйден мектепке дейін қауіпсіздік мәдениеті» атты оқыту семинары өткен. Онда жол қозғалысы қауіпсіздігі, жыныстық қолсұғушылық, бейтаныс адамдармен қарым-қатынас кезіндегі сақтық шаралары, балалық шақтағы жарақаттардың себептері, кәмелетке толмағандар арасындағы құқық бұзушылық, үйден кету және құқық бұзушылықтың алдын алудың басқа да мәселелері қарастырылған.

Жергілікті полиция қызметінің учаскелік инспекторлары мен ювеналды полиция тобы сонымен қатар, аудан орталықтары мен ауылдық округтерде түсіндіру жұмыстарын күшейтіп, шалғай елді мекендерге баса назар аударуды жоспарлап отыр.

Қоғамның бірлескен күш-жігері арқылы ғана қазіргі жағдайда жасөспірімдерге қарсы қылмыстың, буллингтің алдын алуға болады.

Эльвира ЖАРЫЛҚАСЫНОВА,

журналист