31 Мамыр – Саяси қуғын-сүргін құрбандарын еске алу күніне орай облыс орталығында ауқымды іс-шара өтті. Іс-шара саяси репрессия кезінде дүниеден өткен, зардап шеккен қазақстандықтарды еске алуға арналған бір минут үнсіздікпен басталды. Іс-шара барысында саяси қуғын-сүргін және ашаршылық құрбандарына арналған ескерткішке гүл қойылып, қазақ хал¬қы¬ның сан түрлі соқтықпалы, соқпақты кезеңнен өтіп, бүгінгі күнге жеткені, сталиндік репрессия кезінде қазақтың бас¬шылық қызметтегі азаматтары, қоғам қайраткерлері, ең таңдаулы ақын-жазушылары қаза тапқаны айтылды.
– Саяси қуғын-сүргін мен ашаршылық жылдарындағы оқиғалар қазақ халқының мәдениеті мен болмысына өте ауыр тигені анық. Сондықтан, бүгінгі таңда жас та, жасамыс та елдің өткен тарихын білумен қатар, болашақта мұндай оқиғаларға жол бермеуіміз керек. Жалпы, 1937-1938 жылдары қазақ интеллигенциясына қарсы бұрын-соңды болмаған шабуыл жасалды. Ұлтымыздың бас көтерер азаматтары жалған жаланың кесірінен жан алғыш жендеттердің қолынан қаза тапты. Ұлтымыз аса дарынды, білімді асыл тұлғаларынан айырылды. Егер сталиндік репрессия болмағанда, бұл күнде біздің халқымыздың саны 60 миллионға жуықтайтын еді. Кеңестік кезеңдегі тұтас тоталитарлық жүйенің құрбаны болған ел азаматтары ешқашан ұмытылмақ емес. Одан бері қанша уақыт өтсе де, сол жылдардағы қайғы-қасірет қазақ халқының жадында мәңгі сақталады, – дейді Шерхан Мұртаза атындағы халықаралық Тараз инновациялық институты ректорының кеңесшісі, тарих ғылымдарының докторы, профессор Асқар Абдуалы.
Ал, Жамбыл облысы және Тараз қаласы Ауған соғысы ардагерлері мен мүгедектер одағының төрағасы Ермек Дүкенбай іс-шараға қатысушылар рухани сусындап, тарих қойнауын тағы бір парақтап қайтқанынайтып өтті. Айта кетейік, аталғане іс-шараға облыстық және қалалық мәслихаттардың, ардагерлер кеңестері мен қоғамдық кеңестердің, Amanat партиясы облыстық филиалының, этномәдени бірлестіктердің өкілдері және сол кезеңде қаза тапқан марқұмдардың туыстары мен жақындары қатысты.
Есен ӨТЕУЛІ
Ұқсас жаңалықтар
