БҰҰ бас хатшысы Антониу Гутерреш әлем бойынша коронавирус құрбандарының саны миллион адамнан асуы есеңгіретерлік жағдай екенін мәлімдеді деп хабарлайды РИА Новости.
Джонс Хопкинс университетінің мәліметінше, соңғы деректерге сәйкес, әлемде COVID-19 індетінен қайтыс болғандар саны 1 000 555 адамға жеткен.
«Біздің әлем қорқынышты межеге жетті: COVID-19 пандемиясы миллион адамның өмірін қиды. Бұл — есеңгіретерлік көрсеткіш», – деді БҰҰ бас хатшысы.
Сондай-ақ, ол вирустың таралуы, жұмыс орындарын жоғалту сынды күйзелістердің шегі көрінбейтінін атап өтті.
«Біз бұл проблеманы еңсере аламыз. Жіберген қателіктерден сабақ алуымыз керек. Жауапкершілікпен басқару маңызды. Ғылым мен ынтымақтастықтың да маңызы зор», – деді Гутерреш.
Сондай-ақ, оның пікірінше, коронавирус туралы жалған ақпараттар адамдарды өлтіреді. Бас хатшы вакцинаға қол жеткізгенге дейін адамдарды қашықтықты сақтауға, бетперде тағып, қол жуып жүруге шақырды.
Comments are closed.