Соңғы сегіз күнде Зимбабвенің оңтүстігіндегі Хванге қорығында кенеттен қырылған пілдердің саны 22-ге жеткен. Бұл туралы ҚазАқпарат жергілікті «News-24» жаңалықтар қызметіне сілтеме жасап хабарлайды. «Біз пілдердің не себепті қырылғанын әлі білмейміз. Алдын ала зерттеу жүргізген мамандардың пікірінше, олардың өліміне бактериялық жұқтыру себеп болған. Алайда, бактерияның дәл қай түрі екені түсініксіз», - деп мәлімдеді Зимбабве қорықтар мен жабайы табиғатты қорғау басқармасының өкілі Тинаше Фараво. Алғашқы болып қырылған 12 піл 29 тамыз күні Хванге қорығы мен Пандамасуэ орманының шекарасында, Виктория сарқырамасының маңында табылған. «Барлық жануарлардың азулары бүтін болған, яғни бұған браконьерлердің қатысы жоқ екенін білдіреді», - деп атап өтті Фараво. Екі тәуліктен соң Хвангеде осыған ұқсас жағдайда қырылған тағы 10 пілдің өлексесі табылды. Қорық билігі екі жастан алты жасқа дейінгі пілдердің бойы тым аласа болатындықтан ағаш басынан жапырақ жей алмайтындығын айтады. Сондықтан олар жерге жақын өсіп тұрған жапырақтарды, сондай-ақ шөпті жеп, сол арқылы ауру тудырушы бактериялар жұқтырып алуы мүмкін деген болжам жасап отыр.