Кәсіпқой бокстан қазақ арулары арасынан шыққан тұңғыш әлем чемпионы Фируза Шарипова 22 желтоқсанда өзінің ең қиын жекпе-жектерінің бірін өткізеді деп күтілуде. Санкт-Петербург қаласында WBC тұжырымы бойынша әлем чемпионы, финляндиялық Ева Вальстреммен қолғап түйістіретін жерлесіміздің жеңістен үміті зор. Екінші жартылай жеңіл салмақ дәрежесінде жұдырықтасатын Фируза өзіне тиесілі IBO тұжырымының белбеуін бәске тіксе, Ева Вальстрем WBC тұжырымы бойынша әлем чемпионы атағын сарапқа салуға әзір. Жеңгені екі тұжырым бойынша әлем чемпионы атанады.
Ресей Федерациясының Санкт-Петербург қаласында өтетін жекпе-жекті «Хабар» телеарнасы тікелей эфирде көрсетуді жоспарлап отыр. Бокс кеші 22 желтоқсан күні сағат 23:00-де басталмақ.
– Ева Вальстремге қарсы шайқасты Финляндияда өткізу туралы әңгіме болғаны рас. Алайда біздің тарап басымдықты қолға алғысы келді. Кездесуді өзіміз ұйымдастыруға күш салдық. Өйткені бокс кешіне ұйытқы болған тарап қай жағынан алсақ та, басымдыққа ие болатыны сөзсіз. Бұған Сауль Альварес пен Геннадий Головкин арасындағы шайқас дәлел. Егер кездесуді ұйымдастыру жұмыстарымен Головкиннің командасы айналысқанда төрешілер жеңісті Альвареске емес, Головкинге берер еді деп ойлаймын. Сондықтан біз Фирузаға мүмкіндігінше қолайлы жағдай жасауға тырыстық. Енді ол алаңсыз дайындалып, үмітті ақтауы тиіс, – дейді Фируза Шарипованың менеджері Сергей Завилейский.
Табиғат АБАИЛДАЕВ.
Comments are closed.