АСТАНА. ҚазАқпарат — Еуропа лигасы топтық кезеңінің 4-тур ойындары қорытындыланды, деп хабарлайды ҚазАқпарат Sports.kz-ке сілтеме жасап.
Топтық кезеңнің аяқталуына әлі екі тур бар, дегенмен кей командалар плей-оффқа шығу мәселесін шешіп үлгерді.
Өз топтарынан шығып үлгерген командалар мыналар: «Челси» (Англия), «Айнтрахт» (Германия), «Лацио» (Италия), «Байер» (Германия), «Цюрих» (Швейцария), «Арсенал» (Англия), «Динамо» (Хорватия).
Егер «Астана» плей-офф кезеңіне жолдама алса, осы командалардың бірімен күш сынасуы мүмкін. Елордалықтар орналасқан К тобындағы қазіргі кесте бойынша, «Динамо» (Украина) мен «Астана» (Қазақстан) — 8 ұпайдан, «Ренн» (Франция) — 3, «Яблонец» (Чехия) — 2 ұпай жинаған.
Еске сала кетейік, өткен маусымда «Астана» осы турнирдің плей-офф кезеңінде ойнаған. 1/16 финалда елордалық ұжым Португалияның «Спортинг» командасынан жалпы 4:6 (1:3 — өз алаңында, 3:3 — сырт алаңда) есебімен ұтылып қалған болатын.
Comments are closed.