- Advertisement -

Жаһандық міндеттерді шешу үшін бірігу мен ауызбіршілік керек

121

- Advertisement -

Мемлекет басшысы Астана клубының үшінші отырысына қатысты.
Елбасы Астана клубы Еуразия құрлығының болашағы үшін өзекті мәселелерді кең ауқымды сараптамалық деңгейде талқыға салатын бірегей өңірлік басқосу алаңы екенін атап өтті. Нұрсұлтан Назарбаев Астана клубының жұмысы аясында қазіргі заманның түйткілді мәселелерін шешудің тиімді жолдарын табуға болатынын айтты.
– Біз әлемге соңғы уақытта жетіспей жатқан нәрсені бергіміз келеді. Бұл – жаһандық міндеттерді шешу үшін бірігу, ауызбіршілік пен толеранттылық таныту, – деді Қазақстан Президенті.
Мемлекет басшысы халықаралық терроризм мен экстремизмнің белең алуына әкеп соқтыратын әлемдегі геосаяси және идеологиялық күйреудің күшейіп келе жатқанын айтты.
– Жаһандық дамудың жаңа беталысы Шығыс – Батыс бағыты бойынша геосаяси, геоэкономикалық және геоидеологиялық күйреудің күшеюі жағдайында жүріп жатыр. Саяси қуғын-сүргін, кедейлік, білім беру мен денсаулық сақтау деңгейінің төмендігі халықаралық терроризм мен экстремизмнің белең алуына себепші болып отыр, – деді Елбасы.
Сонымен қатар, Нұрсұлтан Назарбаев өңірлік және халықаралық қауіпсіздіктің қазіргі жүйесінде бірқатар мәселелердің бар екенін атап өтті. Олар – әлемнің экономикалық және технологиялық кеңістігін бөле-жарып, қауіп төндіретін санкциялық соғыстар.
Қазақстан Президенті жаһандық шиеленістің күшейюіне әсер ететін милитаристік пиғылдың таралуын, қарулану үдерісінің артып келе жатқанын, сондай-ақ, ядролық қаруды қолдану қаупінің қайта пайда болғанын айтты. Бұл ретте, халықаралық терроризм мен экстремизм апаттық ауқымға ие болғанын атап өтті.
– Үшінші мыңжылдық басталғалы террорлық актілердің де, қаза болғандардың да саны он есе өсті. 104 елде террорлық акт жасалды. Бұл – әлемнің тең жартысынан астамы. Географиясы мен ауқымы жағынан біз, шартты түрде айтқанда, үшінші дүниежүзілік соғыс – террорға қарсы соғыс жағдайындамыз, – деді Нұрсұлтан Назарбаев.
Бұдан бөлек, Мемлекет басшысы соңғы 25 жылда әлемдегі халықаралық мигранттардың саны екі есе өсіп, бүгінде 250 миллион адамнан асқанын атап өтіп, бағынбайтын сипаттағы жаһандық көші-қон мәселесіне назар аударды.
Қазақстан Президенті аталған мәселелерді шешу үшін Еуразия құрлығы қауіпсіздік, экономикалық өсім мен диалог саласында біріктіруші күн тәртібін ұсына алатынын айтты.
Нұрсұлтан Назарбаев «Бір белдеу, бір жол», Еуразиялық экономикалық одақ, Шанхай ынтымақтастық ұйымының экономикалық өлшемі атты бастамаларды, «Нұрлы жол» бағдарламасын және басқа да жобаларды іске асыру Еуразия құрлығының жаңа геоэкономикалық кескінін жасауға мүмкіндік беретінін атап өтті.
Соңында Мемлекет басшысы жиында болған пікірталас орнықты жаһандық даму мақсатында әрі қарай нақты шешімдер қабылдау үшін септігін тигізетініне сенім білдірді.
Жиын соңында Қазақстан Президенті достық пен ынтымақтастықты нығайтуға, сондай-ақ, Қазақстан мен Ресей арасындағы мәдени байланыстарды дамытуға қосқан елеулі үлесі үшін «Первый канал» акционерлік қоғамының бас директоры К.Эрнстті ІІ дәрежелі «Достық» орденімен марапаттады.

Comments are closed.

Page Reader Press Enter to Read Page Content Out Loud Press Enter to Pause or Restart Reading Page Content Out Loud Press Enter to Stop Reading Page Content Out Loud Screen Reader Support