Қазақстанның Тұңғыш Президенті Нұрсұлтан Назарбаевтың атына Ресей Федерациясының Президенті Владимир Путиннен, Қытай Халық Республикасының Төрағасы Си Цзиньпиннен, Түркия Республикасының Президенті Режеп Тайип Ердоғаннан, Өзбекстан Республикасының Президенті Шавкат Мирзиёевтен, Түрікменстанның Президенті Гурбангулы Бердімұхамедовтен, Тәжікстан Республикасының Президенті Эмомали Рахмоннан, Сербия Республикасының Президенті Александр Вучичтен және Хорватия Республикасының бұрынғы Президенті Степан Месичтен жеделхаттар келіп түсті. Сондай-ақ аталған тұлғалар Елбасының сырқаттанып қалуына байланысты өз жеделхаттары арқылы алаңдаушылықтарын білдіре отырып, тезірек сауығып кетуіне тілектес екендігін жеткізді, деп хабарлады Елбасының баспасөз қызметі.
«Мен Сізге осы қиын сәтте қолдау білдіргім келеді. Сіздің ерекше өмірлік энергияңыз, сергектігіңіз бен оптимизміңіз қысқа мерзімде вирусты жеңуге көмектеседі деп сенемін. Шын жүректен Сіздің толық айығып кетуіңізді тілеймін. Деніңіз сау болсын», делінген Ресей Федерациясы Президентінің жеделхатында.
* * *
ҚХР Төрағасының жеделхатында: «Коронавирус инфекциясы өрши бастаған сәттен Қытай мен Қазақстан эпидемияға қарсы жемісті ынтымақтастық жүргізіп келеді. Бұл Қытай-Қазақстан қатынастарының мәңгілік жан-жақты стратегиялық серіктестігінің жоғары деңгейі мен ерекше сипатын көрсетіп отыр. Сондай-ақ халықаралық қауымдастық үшін пандемияға қарсы бірлесіп әрекет етудің жарқын үлгісіне айналды. Эпидемияны жеңетінімізге кәміл сенімдімін. Ал екіжақты қатынас бұдан да нәтижелі дами түседі деген ойдамын. Мен Сізбен қалыптасқан жақын достық қарым-қатынасты ерекше бағалаймын және шын жүректен тезірек сауығып кетуіңізді тілеймін», деп жазылған.
* * *
Түркия Президенті тілеулестігін өз жеделхаты арқылы былай жеткізді: «Сырқаттанып қалғаныңызды өкінішпен естідім. Алладан шипа беруін тілеймін. Үнемі жеңіспен еңсерген күрестердегі сынды бұл сынақты да жігеріңізбен артқа тастайтыныңызға кәміл сенемін. Қандай да бір қажеттілік туындаған жағдайда қолымыздағы барлық мүмкіндігімізбен жаныңызда екенімізді жеткізгім келеді. Сізге деген терең құрмет пен сүйіспеншілік сезімімен жеке өзім және барша түрік халқы атынан тезірек сауығып кетуіңізді шын жүректен тілеймін».
* * *
Өзбекстан Президенті өз лебізін жеделхат арқылы: «Сізге осынау қиын-қыстау уақытта жан-жақты қолдау көрсетуге және жаныңызда болуға дайын екенімді жеткізгім келеді. Жақын арада Сіздің бұл вирусты жеңіп, сауығып кететініңізге сенімдімін.
Құрметті Нұрсұлтан Әбішұлы, Алла тағала Сізге зор денсаулық, күш-қуат, ұзақ ғұмыр және жаңа табыс берсін деп тілеймін. Жақында Өзіңізбен жүздесу мүмкіндігі туады деген үміттемін», деп білдірген.
* * *
«Өмірлік энергияңыз бен ерік-жігеріңіздің арқасында Сіз бұл дертті қысқа мерзімде еңсересіз деп сенемін. Сізді барынша қолдауға және қажет болған жағдайда көмектесуге дайынмын. Шын жүректен тезірек сауығып кетуіңізді тілеймін. Алла тағала Сізге мықты денсаулық және ұзақ ғұмыр берсін», делінген Түрікменстан Президентінің жеделхатында.
* * *
Тәжікстан Президентінің жеделхатында: «Сізге бауырластық қолдауымды білдіргім келеді. Шын жүректен тезірек толық сауығып кетуіңізді және ұзақ ғұмыр, бақ-береке тілеймін. Сізге деген зор құрметім мен ыстық ықыласымды қабыл алыңыз», делінген.
* * *
Сербия Президенті өз жеделхаты арқылы: «Өзіңізге тән энергия, күш-қайрат, оптимизм коронавирустан басым түсеріне сене отырып, Сізге қолдауымды білдіргім келеді. Жақын арада халықаралық қоғамдастық өзара түсіністік пен ынтымақтастықтың арқасында пандемияны еңсереді және кедергісіз әлеуметтік-экономикалық даму жолына қайта оралады деген үміттемін. Айығып кетуіңізді шын жүректен тілеймін. Менің зор құрметім мен ыстық ықыласымды қабыл алыңыз», деген ізгі тілегін жолдаған.
* * *
Сондай-ақ кейбір мемлекет басшылары Елбасына арналған сәлемін Twitter әлеуметтік желісі арқылы жеткізді. Атап айтқанда, Израиль Президенті Реувен Ривлин Нұрсұлтан Назарбаевқа тезірек сауығып кетуіне тілектестік білдіре отырып, біздің елдеріміздің жақсы қарым-қатынасты жалғастырып келе жатқанын жеткізді.
* * *
Үндістанның Премьер-Министрі Нарендра Моди де өзінің ізгі тілегін әлеуметтік желі арқылы білдірді.
«Қазақстанның Тұңғыш Президенті – Елбасы Нұрсұлтан Назарбаевтың тезірек сауығып кетуін және мықты денсаулық тілеймін. Біз Қазақстанды, біздің досымызды және стратегиялық серіктесімізді COVID-19 пандемиясын жеңуге деген ұмтылысын қолдаймыз», деп жазды Үндістанның Премьер-Министрі Нарендра Моди өзінің Twitter-дегі жазбасында.
* * *
Хорватияның бұрынғы Президенті Степан Месич Қазақстанның Тұңғыш Президентіне жолдаған жеделхатында: «Сіздің сырқаттанып қалғаныңыз туралы хабарды алаңдаушылықпен қабылдадым. Шын жүректен тезірек толық сауығып кетуіңізді, күш-қайрат пен сарқылмас оптимизм тілеймін», деп жазды.
* * *
Сондай-ақ Елбасының денсаулығына АҚШ-тың Мемлекеттік хатшысы Майк Помпео да алаңдаушылығын білдірді. «Қазақстан Республикасының Тұңғыш Президенті Нұрсұлтан Назарбаевтың COVID-19 індетінен тезірек толық сауығып шығуын тілеймін. Елдеріміз үшін қазір сын сағаты туындады. Бұл індетті де бірлесе жеңетінімізге сенімдімін. Тез сауығып кетіңіз және аман болыңыз!» деп ол өз тілегін Twitter-дегі жеке парақшасында.
* * *
Тұңғыш Президент – Елбасы Нұрсұлтан Назарбаевқа ізгі тілегін жолдаған хаттар легі қазақстандықтар мен шетел азаматтары тарапынан да толассыз жалғасуда.
Мәжіліс депутаттары Нұрсұлтан Назарбаевтың тезірек сауығып кетуін тілей отырып, сарқылмас күш-қуаты мен ерік-жігері Елбасына коронавирус індетін жеңуге мүмкіндік беретініне сенім білдірді. Мәжілістің баспасөз қызметі хабарлағандай, депутаттар Тұңғыш Президенттің кез келген жағдайдан жол табатын ерекше қабілеті еліміздің қиын-қыстау уақыттарға төтеп беріп, болашаққа сеніммен қарауға мүмкіндік береді деп есептейді. Сондай-ақ Мәжіліс депутаттары осы күні барлық қазақстандықтардың Елбасына шынайы жанашырлық танытуы, халықтық қолдауын айғақтайтынын атап өтті. «Біз Елбасымыз Нұрсұлтан Әбішұлы Назарбаевтың тезірек сауығын және ұзақ ғұмыр тілейміз», деді Мәжіліс депутаттары.
Қазақстан Республикасы Конституциялық Кеңесінің Төрағасы Қ.Мәми еліміздің Тұңғыш Президенті – Елбасы, Конституциялық Кеңестің ғұмыр бойы мүшесі Н.Ә.Назарбаевқа өзінің жылы лебізін былай білдіріпті: «Құрметті Нұрсұлтан Әбішұлы! Сіздің коронавирус инфекциясының салдарынан өзін-өзі оқшаулау режіміне көшкеніңіз туралы хабарды мен және Конституциялық Кеңес құрамы да алаңдаушылықпен қабылдады. Сіздің бүкіл өміріңіз бен еңбек жолыңыз конституциялық құндылықтарды бекіту ісіндегі қиындықтар мен жаңа сын-қатерлерді еңсерумен байланысты. Күш-жігерге толы мінезіңіздің, оптимистік ұстанымыңыздың және мықты рухыңыздың арқасында Сіз әрқашан оқиғалар барысын бағындырып, қоғам мен мемлекетті жаңғыртудағы берік бағытыңызды қамтамасыз ете алдыңыз. Конституциялық Кеңестің ғұмыр бойы мүшесі ретінде Сіз Ата заңның үстемдігін қамтамасыз ету жөніндегі қызметке жаңа серпін беріп отырсыз. Конституциялық Кеңес ұжымы жалпыхалықтық қолдауға қосылады және Сізге тез сауығып кетуіңізді, Отанға деген жасампаз қызметіңізді одан әрі жалғастыруды тілейді».
«Аса қадірлі Нұрсұлтан Әбішұлы! Теледидар мен газеттен Сіздің науқастанып қалғаныңызды біліп, хатпен де болса көңіліңізді демегіміз келді. Тезірек сауығып кетіңіз! Аман-есен халқыңызбен қауышыңыз, – дейді ізгі ниетпен Қазақстан Ұлттық ғылым академиясының академиктері С.Қирабаев пен Ә.Бейсенова, – «Ел тілегі – ер тілегі» деген. Дәл осы жауапты да қиын уақытта Сіздің есендігіңіз Отанымыз үшін аса маңызды. Туабітті күрескер, қайтпас қайсар тұлғасыз, сондықтан төтеннен келген бұл кеселді де жеңетініңізге сенімдіміз. Жаратқан иеміз Сізге ерік-жігер, күш-қуат берсін. Санаулы күндерде маңдайыңыз жарқырап, отбасы-әулетіңіздің ортасында, ел алдына шығуға жазсын. Шуақты, арайлы күндер көп болсын!»
Ал академик Т.Шарманов өз тілегін: «Бүгінгі таңда халықтың мазасын алған коронавирус инфекциясынан тезірек жазылып кетуіңізге шынайы тілегімді жолдаймын. Тәуелсіз Қазақстан халқының арайлаған таңы әрдайым өзіңізбен бірге атып келеді. Лайым, ұзақ уақыт бойы осылай болуға жазсын. Зор денсаулық, сапалы ұзақ ғұмыр тілеймін», деп жолдады.
«ArcelorMittal» компаниясының төрағасы – бас директор Л.Н.Миттал да Тұңғыш Президенттің тезірек сауығып кетуіне тілектестігін білдірді.
«Мұнайгаз кешені ардагерлері» РҚБ Кеңесінің төрағасы, Қазақстанның Еңбек Ері Ұзақбай Қарабалин мен осы қоғамдық бірлестіктің Бас директоры Зейнолла Алшымбаев: «Біздер – мұнайшылар, бізді Нұрсұлтан Әбішұлымен тығыз да бөлінбес байланыс біріктіріп тұр деп есептейміз. Біздің әріптестеріміз әрқашан мұнайгаз саласының қарыштап дамуына себеп болған оның қамқор көзқарасын ұмытқан емес. Біз, қазақстандық мұнайшылар, Елбасын еліміздің «№1 мұнайшысы» деп атаймыз. Болған іске қарамастан, Елбасының темірдей ерік-жігерін, оның өмірлік энергиясын, берік рухын жақсы білеміз. Міне, нақ осы асыл қасиеттері оны бұл сынақтан да алып шығатынына бек сенеміз. Мұнайгаз саласының ардагерлері, Нұрсұлтан Әбішұлының тезірек сауығып кетуіне шын жүректен тілектестік білдіреді. Сізге ұзақ та белсенді, шығармашылық өмір тілейміз. Қадірлі Елбасы, біз әрқашан Сізбен біргеміз!», дейді өздерінің қолдау-хатында.
М.Ю.Лермонтов атындағы Мемлекеттік академиялық орыс драма театрының ұжымы: «Елбасын өмірдің қай соққысына да төтеп бере алатын күрескер ретінде білеміз. Жер жүзінде миллиондаған адам Елбасына үлкен құрметпен, махаббатпен қарайды. Біз де денсаулық тілегендерге қосылып, Елбасына күш, жігер мен жақсы көңіл күй тілейміз», деп жазады.
«Назарбаев Зияткерлік мектебі» дербес білім беру ұйымының басқарма төрағасы К.Шәмшидинова өз хатында: «Біз, Назарбаев зияткерлік мектебінің оқушылары мен мұғалімдері, Сіздің оқшауланғаныңыз туралы хабарды естіп, қатты алаңдадық. Сізді уайымдаймыз. Сіздің табандылығыңыз, өмірге құштарлығыңыз, жігеріңіз бен қуатыңыз бұл ауруды жеңеді деп сенеміз», депті.
«Өзіңіз негізін қалаған Л.Н.Гумилев атындағы Еуразия ұлттық университетінің ұжымы тезірек айығуыңызға, қиындықты еңсеруіңізге тілектес. Бұл сынақтан да мүдірмей өтесіз деп кәміл айта аламыз. Жаратқан иеміз жақсы күндерде, қуанышты жағдайда, нақты айтсақ Еуразия ұлттық университетінің 25 жылдық мерейтойының төрінде кездесуге жазсын!», дейді осы оқу орнының ректоры Е.Сыдықов.
Абай атындағы Қазақ ұлттық педагогикалық университетінің ректоры Т.Балықбаев өзі басқарып отырған білім ошағы ұжымының атынан: «Кең-байтақ Отанымыздың әр аймағынан сіздің денсаулығыңызға алаңдаған жұртшылықтың жүрек дүрсілі, өзіңізге деген елдің шын тілектестігі ақпараттар әлемін дүбірлетуде. Бұл туған халқыңыздың Елбасына деген сүйіспеншілігінің жарқын көрінісі деп білемін. Жаратылысы бөлек, рухы күшті, жігері құрыш, қажыр қайраты толағай Сіздің бұл сыннан да жасындай жарқылдап өте шығатыныңызға сенемін және осыған тілектеспін», деген тілегін жеткізіпті.
Назарбаев Университеттің басшысы Ш.Катсу: «Назарбаев Университеттің студенттері, ата-аналары және барлық қауымдастығы атынан Сізге шын көңілден деніңізге саулық, қажымас күш-қуат, ұзақ ғұмыр тілейміз. Біз Сізбен біргеміз!» дейді өз хатында.
«Сіз инженерлік білім негіздерін алған жоғары оқу орны – Қарағанды мемлекеттік техникалық университетінің оқытушылары, қызметкерлері, докторанттары, магистранттары мен студенттері, сан мыңдаған ұжымы шын жүректен Сіздің тезірек сауығып кетуіңізді тілейді. Мұқалмас ерік-жігеріңіз, күшті мінезіңіз, оптимистігіңіз осы қиын сын-қатерді тез жеңеді деп сенеміз. Шын жүректен Сізге зор денсаулық тілейміз», дейді Қарағанды мемлекеттік техникалық университетінің ректоры М.Ибатов.
«Сіз жүргізген сындарлы саясат пен реформалар тәуелсіз Қазақстан тұрғындарының әл-ауқатына тек жақсы жағынан әсер етті. Нұрсұлтан Әбішұлы, біз қарапайым жұмысшы тап өкілдері Сіздің тезірек сауығуыңызды тілейміз. Қазір мыңдаған қарағандылықтың өзіңізге қолдау білдіріп отырғанын білсеңіз дейміз», депті ізгі ниетпен «YDD Corporation» Қарағанды ферроқорытпа зауытының, «Qazaq Carbon» құю зауыттары бірлестігінің ұжымы және акционерлер Е.Нығматулин, Д.Кемертелидзе, Ж.Аппаз.
«Астана Балет» театрының ұжымы атынан мекеме директоры А.Савостьянов өз қолдауын былай жеткізіпті: «Мәдениет саласына деген ерекше ықыласыңыздың арқасында еліміздің өнерін халықаралық аренада мақтанышпен таныстырып жүрген қайталанбас шығармашылық ұжымдар қалыптасты. Өзіңізге зор денсаулық пен тезірек сауығып кетуіңізді тілейді».
Қазақстанның Триатлон федерациясының спортшылары Елбасына «Федерация спортшыларының атынан деніңізге саулық, мықты рух пен жақсылық тілейміз. Барша қазақстандыққа үлгі болған күш-қуатыңыз осы жолғы сынақтан да жеңімпаз болып шығуыңызға көмектесетініне сенімдіміз», деген лебіздерін арнады.
Қазақстан республикалық кәсіби бокс федерациясының президенті Е.Бекхожин: «Дүние жүзін жаулап алған вирус Қазақстанның Тұңғыш Президенті Нұрсұлтан Әбішұлын да айналып өтпегенін естіп, зор қайғыда қалдық. Елбасының бойына қуат, бақытты ғұмыр, ұзақ өмір тілейміз!» дейді.
«Самұрық-Қазына» АҚ компаниялар тобының 300 мыңнан астам қызметкері: «Сіздің тез арада сауығып кетуіңізді тілейміз. Барша әлемді жайлаған дағдарыс жағдайында Сіздің ерекше қамқорлығыңызды және мейіріміңізді сезіндік. Біз Сізге әрдайым тілектеспіз. Бұл дертті тез арада жеңетініңізге сенімдіміз», депті өз хаттарында.
Назарбаев Университеттің барлық студенттері мен түлектері де Елбасына өздерінің қолдауларын жеткізді.
Елордадағы Ұлттық музейдің директоры Арыстанбек Мұхамедиұлы Тұңғыш Президентке тілектес екенін танытып: «Музей қызметкерлері Сіз артқан сенімді ақтау жолында еңселі еңбек етіп келеді. Қазақстан Республикасы Ұлттық музейінің ұжымы Сізге зор денсаулық және тезірек сауығып кетуіңізді тілейді!» деді өз хатында.
Сонымен қатар ERG компаниялар тобының, Соколов-Сарыбай өндірістік бірлестігінің, «Ahsel Holding», «Сантехпром» ЖШС, «Теміртау электр металлургиялық комбинаты» АҚ, «Орталық Азия отын-энергетикалық компаниясы» АҚ, «АК Алтыналмас» АҚ, «Сары Казна» ЖШС, «Қазақстан алюминийі» АҚ және басқа да көптеген құрылымның еңбек ұжымдары, басшылары және жекелеген азаматтар Елбасына өздерінің ыстық ықыластарын білдіріп, сауығып кетуін тілеген хаттарын жолдауда.
Comments are closed.