Облыстық архивте өңірдің қоғамдық-экономикалық дамуына елеулі үлес қосқан аналардың, әйелдердің жеке тектік құжаттары сақталған. Мәселен, Социалистік Еңбек ерлерінен бастап, ақын, білім беру ісінің, спорт саласының үздіктері, Қазақ КСР-нің еңбек сіңірген әртістері, журналист, мәдениет қайраткерлері, Жамбыл облысы мен Тараз қаласының Құрметті азаматтары атағын алғандардың өмірбаяны мен облысқа сіңірген еңбегі жөнінде мәлімет беретін фото-құжаттар бар. Бүгінде тарихи дерекке айналған мұраларды жамбылдықтар мәжіліс залында қойылған «Ананың жүрегі – әлемнің тірегі» атты көрмеден келіп көре алады.
Жеке қорлардан алынған 30-дан аса құжатты сурет көрмесі 8 наурыз – Халықаралық әйелдер күні мерекесіне орай ұйымдастырылғанын айта кеткен жөн. Көрменің ашылу салтанатында облыстық архивтің директоры Қалдыкүл Башенова сөз сөйлеп, 8 наурыз – Халықаралық әйелдер күні мерекесі аясында ашылып отырған құжаттар көрмесінің мән-маңызына тоқталды.
Құжаттар көрмесіндегі жеке тектік қордан алынған әр тұлғаға арналған құжат суреттер келушілердің қызығушылығын туғызды. Гүлсін Орынбаева, белгілі кәсіпкер Гүлдара Нұрымова, «Қаралма» ЖШС-ның директоры Балагүл Махатовалар қатысқан шарада облыстық «Қызыл Жарты Ай» филиалының директоры Оразкүл Тастемірова бұл іс-шара әйелдердің қоғамдағы рөлін айқындай түскенін айтты.
Іс-шарада белгілі әнші Бақыт Шағырбаев жырдан шашу шашып, әуелете ән шырқады.
Сағындық Зейнуллаұлы,
облыстық мемлекеттік
архивтің бөлім басшысы.
Comments are closed.