Биылғы жаңа оқу жылынан бастап өңірдің барлық мектептері мен колледждеріне «Кәсіпкерлік пен бизнестің негіздері» аталатын жаңа элективті пәнді оқыту енгізілген-ді. Осыған байланысты Тараз қаласындағы №13 темір жол колледжінде облыстық кәсіпкерлер палатасының бизнес-жаттықтырушылары мен сарапшыларының дәрістер оқуы ұйымдастырылды.
Жаңа пәнді ҚР «Атамекен» Ұлттық палатасы әзірлеген. Ол биылғы жаңа оқу жылынан бастап еліміздің, оның ішінде өңіріміздің де жалпы білім беретін мектептерінің 10-сыныптарына ресми түрде енгізіліп отыр. Өткен жылы бұл пәнді оқыту жер-жердегідей біздің облысымызда да №9 пилоттық мектебі базасында тәжірибелік сынақтан өткен болатын.
«Бұл жай ғана пән емес, еліміздегі кәсіпкерлік сауаттылық деңгейін арттыруға септесетін біртұтас жүйе. Пән аптасына екі рет оқытылады. Жылына бар-жоғы 68 сабақ өтуі қарастырылған. Оның ішінде 30 пайызы – теориялық, 70 пайызы – тәжірибелік сабақтар. Жалпы, бағдарлама теориялық оқыту, ойын түрінде тәжірибелік тапсырмалар беру, бизнес-кейстерді талдау секілді кезеңдерден тұрады. Оқытушыларға арналған семинарлар да ұйымдастырылады. Оқулық авторлары мен бизнес-жаттықтырушылар тарапынан мұғалімдерге кәсіпкерлік негіздерін оқыту курсі туралы жан-жақты таныстырылуда», – дейді өңірлік палатаның адам капиталын дамыту бөлімінің сарапшысы Майя Өмірбекова.
Айта кету керек, ағымдағы жылдың 19-29 тамызы аралығында оқытуды жүйелеу, орта мектеп пен колледж оқытушыларының педагогикалық шеберліктерін жетілдіру және оларды қайта даярлау мақсатында аталған пән бойынша мектептердің – 131, колледждердің 35, жоғары оқу орындарының 38 оқытушысы қатысуымен біліктілік жетілдіру курстары ұйымдастырылған болатын. Бүгінгі күні палатаның арнайы сертификатқа ие бизнес-жаттықтырушысы Айнұр Зәуірбекова аталған пәнді оқыту курсы бойынша облыс колледждері оқытушыларының арасында 80 сағаттық дәріс өткізіп үлгерген. Сондай-ақ бизнес-жаттықтырушы Гүлмира Метерова да оқытушылар мен студенттерге өңірімізде «Бастау», «Бизнес-кеңесші», «Бизнес-өсу», «Іскерлік байланыстар» және «Жас кәсіпкер мектебі» секілді жобалар мен тегін оқыту курстары жұмыс істейтінін насихаттауда. Аталған курстарға жастардың 18-29 жас аралығындағы кез келген санатының қатысып, кәсіпкерліктің қыр-сырын үйренуіне мүмкіндіктері бар.
Биыл жоғарыда аталған пәнді 126 мектептің 10-сыныптарында, 19 колледждің – 3 000, жоғары оқу орындарының 2 926 студенті арасында оқыту көзделуде.
Ақбота БАТЫРБЕКОВА,
журналист.
Comments are closed.