Golovkınge berilgen múmkindik

Orta salmaqtaǵy álem chempıony meksıkalyq Saýl Alvares ózine tıesili belbeýlerdiń birinen aıyryldy. Naqtyraq aıtsaq Alvares IBF tujyrymy boıynsha álem chempıony ataǵymen qosh aıtysty. Óıtkeni ol atalmysh tujyrym boıynsha álem chempıony ataǵyna basty úmitker sanalǵan ýkraınalyq Sergeı Derevánchenkomen shaıqasqa shyǵý týraly kelisimge kele almady. Nátıjesinde belgilengen merzimde jekpe-jekti ótkizý jóninde naqty jaýap bolmaǵandyqtan halyqaralyq boks federasıasy meksıkalyqtan belbeýdi qaıtarý týraly sheshim qabyldaǵan.
Bul – Gennadı Golovkınge berilgen múmkindik. Kásipqoı bokstyń zańdylyǵy boıynsha bos qalǵan belbeýge negizgi úmitker jáne tıisti uıymnyń reıtıńginiń kóshbasshysy talasýy kerek. Halyqaralyq boks qaýymdastyǵy ýkraınalyq boksshyny negizgi úmitker retinde belgilese, qazaqstandyq boksshy reıtıńgte kósh tizginin qolǵa alǵan. Sondyqtan eki boksshy chempıondyq ataqty sarapqa salýy tıis.
Beıresmı derek kózderine sensek, qos boksshynyń komandasy kezdesýdi ótkizý týraly sheshimdi qabyldap ta qoıǵan tárizdi. Tipti derekkózder shaıqas 5 qazan kúni Nú-Iorktegi áıgili «Madison Square Garden» kesheninde ótetinin alǵa tartady. Alaıda ázirge eshqandaı resmı málimet taraǵan joq.
Kezinde otandasymyz dál osy Sergeı Derevánchenkomen qolǵap túıistirmegeni úshin IBF tujyrymy boıynsha álem chempıony ataǵynan aıyrylǵan edi. Endi Genaǵa sol olqylyqtyń ornyn toltyratyn múmkindik týyp otyr. Golovkın Sergeıdi jeńse, Alvares Demetrıýs Andrademen shaıqas ótkizip, qalǵan úsh tujyrymnyń belbeýin jınasa, qazaqstandyq pen meksıkalyq boksshy arasynda úshinshi kezdesý ótetini sózsiz. Eki myqty orta salmaq dárejesinde álemniń absolútti chempıony ataǵyna talasar edi. Laıym solaı bolsyn!

Tabıǵat ABAILDAEV.

Comments are closed.

https://4store.com.ua/