Ауылдың айтқыштары
Қошқардың тойы
Белгілі ақын Қасқырбай Нарбатыров бірде бір кісінің баласының тойын басқарады. Баланың аты – Қошқарбай екен. Қасекең мұндайды қалай мүлт жіберсін. Тойды бастар-бастамастан:
– Ал ағайын, қой үстіне бозторғай жұмыртқалаған заман осы. Адам түгіл «аң» мен «мал» да татулығын байқатуда. Қошқардың тойын қасқыр басқарғаны нағыз достықтың белгісі емес пе? – депті.
«Атамыздың асына
барамыз деп…»
Аудандық Мәдениет үйінде Байзақ батырға арналған ғылыми-практикалық конференция өтеді де, әруаққа Құран бағыштаған дастарқан Тараздағы «Бақ сарайы» мейрамханасында жайылыпты. Ақпан айының саршұнақ аязы. Жер көк тайғақ кез. Конференциядан шыққан лауазымды азаматтар бір-бір көлікке мініп, Таразға тартып тұрыпты. Қасекең де бір ауылдас інісінің машинасына мінеді. Інісі жолдың қауіптілігіне қарамай, құстай ұшса керек. Көліктің доңғалағы екі-үш рет тайып кетеді.
– Інім, жай айдашы, асықпашы, барамыз ғой, – депті Қасекең. Інісі сәл баяулатып, аз уақыт өткен соң қайтадан құйындай ұшады. Көлік тағы екі-үш рет тайғанап, қатерден әзер аман қалады. Сонда шыдамы таусылған Қасекең:
– Айналайын інім, көлікті жай жүргізші, атамыздың асына барамыз деп отырып, қасына барып қалмайық, – деген екен.
Байзақ ауданы.
Comments are closed.