Мәслихат сайлауы жоғары деңгейде өтті

75

Облыс әкімдігінің баспасөз қызметінде облыстық аумақтық сайлау комиссиясының төрағасы Махметқали Сарыбеков БАҚ өкілдерімен баспасөз мәслихатын өткізді. Ол «Қазақстан Республикасындағы сайлау туралы» ҚР Конституциялық заңының 101-бабының 4-тармағына сәйкес мәслихаттардың шығып қалған депутаттарының орнына қазан айының соңғы жексенбісінде өткен сайлаудың қорытындылары туралы мәлімдеді.
Оның айтуынша, сайлау облыстық мәслихатқа сайлау жөніндегі №17, Қордай аудандық мәслихатқа сайлау жөніндегі №8 және №13, Мойынқұм аудандық мәслихатқа сайлау жөніндегі №11 сайлау округтері бойынша өткен. Сайлауды дайындау және өткізу шараларына республикалық бюджеттен 19283 мың теңге жұмсалған. Сайлау бойынша барлық округтерден 3 кандидаттан 12 үміткер тіркелген. Оның төртеуін «Нұр Отан» партиясы ұсынса, 8-і өзін-өзі ұсынған. Кандидаттар мен олардың жұбайлары тұрғылықты жері бойынша салық органдарына табысы мен мүлкі жөнінде декларация тапсырған. Декларацияда ешқандай заңсыздық анықталмаған.
№17 Жуалы сайлау округі бойынша тіркелген 17430 сайлаушының 14081-і сайлауға қатысып, өз таңдауын жасаған. Бұл – 80,8 пайыз. Сондай-ақ Қордайдағы №8 сайлау округі бойынша – 88,1 пайыз, №13 округ бойынша – 87,5 пайыз, Мойынқұм ауданының №11 сайлау округі бойынша 83,5 пайыз тұрғындар сайлауға қатысқан. Облыстық мәслихат депутаттығына №17 сайлау округінен 10554 дауыс жинаған (75 пайыз) «Алтайс Групп» ЖШС директоры Әлімбек Жұмабаев депутат болып сайланған.
Қордайдағы №8 сайлау округі бойынша №3 балалар мен жасөспірімдер спорт мектебінің директоры Ғалым Әлімжанов 80,2 пайыз дауыспен, №13 сайлау округі бойынша «Береке» гуманитарлық-техникалық колледжінің директоры Ержан Сүлейменқұл 81,9 пайыз дауыспен, Мойынқұмдағы №11 сайлау округі бойынша В.Терешкова орта мектебінің директоры Абзал Сәлібеков 85,5 пайыз дауыспен депутат болып сайланыпты.
М.Сарыбеков брифинг барысында БАҚ өкілдері тарапынан қойылған сұрақтарға жан-жақты жауап берді.

 

Есет Досалы

Comments are closed.