Ораза айт – Отандастарымыздың бірлігін бекем ете түсетін мереке

Елбасы Нұрсұлтан Назарбаев Қазақстан мұсылмандары діни басқармасының төрағасы, Бас мүфти Ержан Маямеровпен кездесті, деп хабарлады Президенттің баспасөз қызметі. Кездесу барысында еліміздің рухани өміріндегі өзекті мәселелер талқыланды. Мемлекет басшысы Қазақстанда діни ахуалдың тұрақты екенін, түрлі конфессия өкілдері татулық пен келісім жағдайында өмір сүріп жатқанын атап өтті. Сонымен қатар, кездесуде діни білім беру мәселесі қозғалды. Нұрсұлтан Назарбаев жастарға рухани-өнегелі тәрбие берудің маңыздылығына, сондай-ақ, бұл салаға мейлінше мұқият талдау жүргізу қажеттігіне тоқталды. Е.Маямеров Мемлекет басшысына Қазақстан мұсылмандары діни басқармасының қазіргі жұмысы жөнінде баяндады.

Қазақстан Президенті Н.Ә.Назарбаевтың Ораза айт мерекесімен құттықтауы

Қымбатты отандастар! Сіздерді Ораза айт мерекесінің бас­талуымен шын жүректен құттық­тай­мын! Бұл мейрам әлемнің барша мұсыл­ман­дары рухани таза­руға ұмтылатын Рамазан айы­ның аяқталғанын білдіреді. Осы кезеңде қайырымды істер атқа­рып, біздің көмегіміз бен жана­шыр­лығымызға зәру жан­дар­ға қамқорлық көрсетуге деген ізгі ниет пен ықылас арта түседі. Ислам адамзат баласын та­тулыққа, ты­ныштық пен тұ­рақ­тылыққа үндейді. Осы­нау биік құндылықтар тек мұсылман қауы­мын ғана емес, бүкіл Қа­зақстан халқын да ұйыстыра тү­седі. Сондықтан Ораза айт бар­­лық отандастарымыздың бірлі­гін бекем ете түсетін мереке болып саналады. Қазақстан қоғамы өзінің бай рухани мұрасын, өзара сыйластық пен келісімге негізделген іргесі бе­рік қарым-қатынастарын орынды мақтан тұтады. Барша қазақстандықтарды осы дәс­түр­лерді барынша нығайтып, жасампаз құнды­лықтарымызды әрдайым қастерлеуге шақырамын. Қасиетті Ораза айт хал­қы­мызға рухани серпіліс, шаңы­рақ­тарыңызға бақ-береке әкелсін!