Қазақтың жаманы болмас

Шәкәрім. Қазақтың жаманы болмас, Жаманнан аманы болмас. Бірігіп іс қылатұғын, Түзелер заманы болмас! Бұл елде адалдық бар ма, Ондайын байқадыңдар ма, – Ыстайды нені де болса, Наданға арамдық ар ма?! Ар сатар шайға да болса, Бір асам майға да болса. Ізденіп табады, жейді Арамды қайда да болса. Жуаны қылады зорлық, Момынның көргені қорлық. Теп-тегіс қулық пен ұрлық, Ал енді қайтіп ел болдық?!