Үздік түлектер ұлықталды

Тараз қаласындағы орталық «Достық» алаңында Тараз инновациялық-гуманитарлық университетінің әкімшілігі бір топ үздік түлектеріне салтанатты жағдайда диплом тапсыру рәсімін өткізді. Кешті университет ректоры, филология ғылымдарының докторы, профессор Ерболат Саурықов ашып, құттықтау сөз сөйледі. Жоғары оқу орны басшысының айтуынша, ағымдағы жылы ТИГУ-ді 27 бакалавриат және 10 магистратура мамандықтары бойынша екі мыңға жуық түлек бітіріпті. Олардың арасында елу түлек айрықша үлгідегі дипломға ие болған көрінеді. Студенттік жылдарын мазмұнды өткізіп, тұрғыластарынан дараланған үздіктерге дипломдарын Тараз қаласының әкімі Нұржан Календеров, «Нұр Отан» партиясы облыстық филиалы төрағасының орынбасары Шәбден Тілеумұрат, университет ректоры Ерболат Саурықов және облыстық, қалалық әкімдіктердің, жастардың қоғамдық ұйымдарының өкілдері мен ата-аналары тапсырып, өмірдегі қадамдарына сәттілік, алдағы еңбек жолдарына табыс тіледі.

Салтанатты кеш эстрада жұлдыздары мен би ұжымдарының әсем әні, мың бұралған биімен айшықталды.

Сапарғали Әлібай, «Ақ жол».