Көрмені қарашаға дейін созу мүмкін бе?

Қазақстанның тур-операторлары «Астана ЭКСПО-2017» ұлттық компаниясының төрағасы Ахметжан Есімовтен көрменің уақытын созуды сұрады, – деп хабарлайды Tengrinews. Петиция авторларының айтуынша, туроператорлар мен туристік қоғамдас-тықтарда алғаш рет ішкі және сыртқы туризмнің арқасында жақсы табыс табуға мүмкіндік туған. «Қысқа уақыт ішінде жұмыс орындарының саны өсіп, жақсы табыс таптық. Компаниялар жұмысқа 10 адамнан 200 адамға дейін қабылдап жатыр. Бүгінде EXPO-2017 көрмесін тек қысқа мерзімге созу мәселесі тұр. Құрметті Ахметжан Смағұлұлы, туристік қоғамдастықтың атынан Сізден ҚР Президенті мен Халықаралық көрмелер бюросынан көрмені 1 қарашаға дейін созу мәселесін қарастыруды ұсынып көруіңізді сұраймыз», делінген Ахметжан Есімовке жазылған үндеуде. Петиция авторларының айтуынша, бұл қызмет көрсету және туризм саласын дамытуға көмегін тигізеді. Айта кетейік, петицияға қол қойғандардың ішінде Қазақстанның туризм ассоциациясының, қонақ үй бизнесінің өкілдері, сондай-ақ туристік компаниялар мен мейрамханалардың өкілдері бар. Өз кезегінде «Астана ЭКСПО-2017» ҰК АҚ қоғаммен байланыс департаментінің директоры Сергей Куянов көрменің уақытын созу мәселесінің қиын екенін айтты. «Біріншіден, Халықаралық көрмелер бюросы бізге регламент белгіледі. Екіншіден, көрме дегеніміз – көрменің қатысушылары деген сөз. Қатысушылардың өз бюджеттері белгіленген. Сондықтан бұл оңай шешілетін мәселе емес», деп түсіндірді Сергей Куянов.