Астанада Жамбыл облысының күндері өтеді

Ел Тәуелсіздігінің 25 жылдығына орай қыркүйек айының 23-25 аралығында Астанада Жамбыл облысының күндері өтеді. Осыған байланысты бірқатар мәдени іс-шаралар өткізу жоспарланған. Онда «Қазақстанда жасалған» деген атаумен өңір шаруаларының өнімдері жәрмеңкеге шығарылады. Сондай-ақ, ҚР Ұлттық мұражайында облыстық тарихи-өлкетану мұражайының көрмесі ұйымдастырылады. Облыстық қазақ драма театры облыстың Астанадағы күндерінде М.Әуезовтің «Қилы заман» тарихи драмасы мен «Еңлік-Кебек» трагедиялық қойылымдарын Елорда жұртшылығының назарына ұсынбақ. Бұдан өзге облыстық орыс драма театры С.Маршактың балаларға арналған «Мысықтың үйі» ертегісін, Ф.Булякованың «Кемпірлер тұрмысқа шыққанда» комедиялық қойылымы мен «Теңіз жағалай жүгірген тарғыл төбет» театрлан­дырылған қойылымын қоюды жоспарлап отыр. Бейбітшілік және Келісім Сарайында «Ұлы Дала – Ұлысым» атты гала-концертінен соң, Астанадағы облысымыздың мәдениет күндерінің жабылу салтанаты өтеді.