Мемлекет басшысы Энергетика министрі Қанат Бозымбаевты қабылдады

Кездесу барысында Қ.Бозымбаев Елбасына мұнай-газ, мұнай-газ химиясы және энергетика салаларындағы дамудың негізгі көрсеткіштері туралы баяндады, сондай-ақ алдағы кезеңге арналған жұмыс жоспары жөнінде мәлімдеді. Сонымен қатар, мұнай өңдеу және энергетика өнеркәсібіндегі ірі инвестициялық жобалардың іске асырылу барысы, оның ішінде жыл соңына дейін Қашаған кен орнын қолданысқа енгізу жоспары, Теңіздің өндірістік қуаттылығын арттыру және Қарашығанақ кен орнындағы сұйық көмірсутегі өндірісін ұлғайту мәселесі талқыланды. Мемлекет басшысы жоғары деңгейдегі бәсекеге қабілеттілікті қамтамасыз ету және экономикадағы энергия тасымалдау үшін өсіп отырған қажеттіліктерді қанағаттандыру мақсатында отын-энергетика кешенін одан әрі дамыту керектігіне назар аударды. Бұдан бөлек, Қазақстан Президенті елдің ғылыми-технологиялық әлеуетін арттыру үшін шаралар қабылдау және төмен көміртекті даму мен «жасыл экономикаға» өтуін қамтамасыз ету жөнінде жағдай туғызудың маңыздылығын атап өтті. Энергетика министрі биыл мұнай өндіру көлемінің аздап қысқаруы әлемдегі негізгі энергетикалық ресурстарға бағаның төмендеуімен байланысты болып отырғанын атап өтті. – Бірінші жартыжылдықтың қорытындысы бойынша 38,8 миллион тонна мұнай өндірілді. Ол өткен жылғы осы кезеңдегі өндіру көлемімен салыстырғанда 97%-ды құрайды. Биыл жыл соңына дейін өндіру көлемін 75 миллион тоннаға дейін арттыру жоспарланып отыр. Сонымен қатар 6,9 миллион тонна мұнай өңделді, ол былтырғы жылдың көрсеткішімен салыстырғанда шамамен 5%-ға артық, – деді Қ.Бозымбаев. Елбасы кездесу қорытындысы бойынша бірқатар нақты тапсырма берді.