Алматыда сел тасқынынан кейін 500-ге жуық адам қауіпсіз аймаққа көшірілді

Алматы қаласының Наурызбай ауданында болған сел тасқынынан кейін соңғы мәліметтер бойынша 500-ге жуық адам қауіпсіз аймаққа көшірілді.

Бұл туралы ҚазАқпарат тілшісіне ІІМ Төтенше жағдайлар комитетінің «Қазселденқорғау» ММ-нің Алматы аймақтық техникалық пайдалану басқармасы басшысының орынбасары Самат Дәуленқанов мәлім етті.

Оның айтуынша, Алматы тұрғындарына келер ешқандай қауіп жоқ. Қазір селдің салдарын жою жұмыстары жүргізіліп жатыр. Су Қарғалы өзені бойымен шлюздер арқылы төмен қарай ағыздырылып жатыр.

«Соңғы күндері күннің қатты ысып кетуіне байланысты мұздықтар еріп, Қарғалы өзеніндегі бөгеттің жоғары жағында, яғни тау ішінде мореналық көлшіктің суы көтерілді. Оның жиегі бұзылмағанымен, ондағы жиналған су көлшіктің табаны арқылы өтіп кетіп, бөгетке қарай аққан. Бірақ бөгет бұзылған жоқ. Таудан домалаған тастар осында тірелді. Көлшікте қазір су жоқ. Екінші тасқын болмайды. Қазір Алматы аймақтық техникалық пайдалану басқармасы тарапынан 15 техника мен жеке құрамнан 40 адам селдің салдарын жою жұмыстарына жұмылдырылған», – деді Дәуленқанов.

Айта кетелік, қазір оқиға орнында Алматы қалалық Төтенше жағдайлар департаментінің бөлімшелері де табиғи апат салдарын жою жұмыстарын жүргізуде.

Соңғы мәліметтер бойынша Қарғалы өзені бойындағы тұрғын үйлердің тұрғындары аудандық әкімдік пен №176 орта мектепке орналастырылып жатыр.