Қой асығы демегін...

Құландық қос боксшы олжа салды

Бокстан 2003-2004 жылы дүниеге келген балғын былғары қолғап шеберлері Астана қаласының ашық чемпионатына қатысып қайтты. Дуы басым додаға еліміздің әр қиырынан көптеген боксшылар Астанаға ат басын бұрып, елорда төрінде керілген шаршы рингке көтерілді. Бұл сынға Құлан өңірінен ағайынды Рауан Раушанбек пен Ерсін Раушанбек те барды. Жаттықтырушы Бақытжан Қожахметов бастап барған қос оғлан шаршы рингте әдемі ұрыс сала білді. Ә дегеннен қарсыластарына дес бермеген 32 келідегі Рауан Раушанбек ақтық сынға алқынбай шығып, финалда да қарсыласын бұрыштан-бұрышқа қуып жүріп жеңіске жетті. 36 келіде сынға түскен оның бауыры Ерсін Раушанбек тек жартылай финалда ғана қарсыласына есе жіберіп, қола жүлдегер атанды. Қос боксшының да алар асуы мен бағын­дырар биігі алда деп сенейік. Ермаханның ізбасарлары батыр ағаларының жеңісті жолын жалғастыра берсін!

Табиғат АБАИЛДАЕВ, «Ақ жол».