Бейбітшілік – баянды бақыттың бастауы
Аспаны ашық, таңы тыныш атқан әрбір күн – адамзат үшін баға жетпес бақыт. Бейбітшілік – бұл жай ғана соғыстың болмауы емес, ол – жүректердегі сенім, адамдар арасындағы түсіністік, ел ішіндегі татулық. Бейбіт өмір сүріп жатқан халық қана болашағына нық қадам басып, ұрпағына жарқын жол аша алады.
Тарихқа көз жүгіртсек, бейбітшіліктің оңайлықпен келмегенін аңғарамыз. Қаншама зұлмат жылдар, қаншама тағдырлар… Сол қиын кезеңдердің сабағы бізге бір нәрсені ұғындырды: татулық пен бірлік болмаса, тұрақтылық та болмайды. Сондықтан бейбіт өмірдің әр сәтін бағалау – өткенге тағзым, болашаққа аманат. Бейбіт өмір – адамның еркін тыныстап, армандарын жүзеге асыруына мүмкіндік беретін алтын кезең. Осындай уақытта ғылым дамиды, мәдениет өркендейді, өнер шарықтайды. Баланың күлкісі, ананың алаңсыздығы, әкенің нық қадамы – бәрі де бейбіт күннің белгісі. Ал бірлік – сол бейбітшіліктің темірқазығы.
Бірлігі бекем ел ешқашан еңсесін түсірмейді. Түрлі ұлт пен ұлыс өкілдерінің бір шаңырақ астында сыйластықпен өмір сүруі – нағыз өркениетті қоғамның көрінісі. «Бірлік бар жерде – тірлік бар» деген халық даналығы да осыны меңзейді. Бейбітшілік күні – тек мереке емес, ол – ойланатын, бағалайтын, шүкіршілік ететін сәт.
Бұл күн әрқайсымызға жауапкершілік жүктейді: өз ортамызда татулықты сақтап, бір-бірімізге құрметпен қарау. Себебі үлкен бейбітшілік – кішкентай ізгіліктерден басталады. 1 мамыр – Қазақстан халқы үшін ерекше маңызы бар мерекелердің бірі.
Бұл күн елімізде Қазақстан халқының бірлігі күні ретінде аталып өтеді. Аталған мереке 1996 жылдан бастап ресми түрде тойланып келеді. Оны Қазақстан Республикасының Тұңғыш Президенті өз Жарлығымен халықтар арасындағы достық пен татулықты дәріптейтін мереке ретінде белгіледі. Бұл мерекенің басты мәні – елімізде өмір сүріп жатқан түрлі ұлт пен ұлыс өкілдерінің ынтымағы мен бірлігін нығайту. Бүгінде Қазақстанда 130- дан астам этнос өкілі тату-тәтті өмір сүріп жатыр. Әрқайсысы өз мәдениетін, тілін, салт-дәстүрін сақтай отырып, ортақ Отанымыз – Қазақстанның дамуына үлес қосуда. Бұл – еліміздегі тұрақтылық пен бейбітшіліктің айқын көрінісі. Қазақ халқы ежелден «Бірлік бар жерде – тірлік бар» деп бекер айтпаған.
Расында да, елдің дамуы мен өркендеуі халықтың ауызбіршілігіне тікелей байланысты. Бірлігі жарасқан ел ғана биік белестерді бағындырып, болашаққа нық қадам басады. Сондықтан 1 мамыр мерекесі – тек күнтізбедегі атаулы дата емес, ол – бейбіт өмірдің, достықтың және өзара құрметтің символы. Бұл күні еліміздің барлық өңірінде түрлі мәдени іс-шаралар, концерттер, көрмелер мен фе стива льдер ұйымдастырылады. Әртүрлі этнос өкілдері ұлттық өнерін паш етіп, өз мәдениетімен бөліседі. Мұндай шаралар халықтар арасындағы байланысты одан әрі нығайтып, жас ұрпаққа достықтың қадірін түсіндіреді.
Қазіргі әлемде татулық пен келісімнің қадірі бұрынғыдан да арта түсті. Сондықтан Қазақстандағы ұлтаралық келісім – біздің ең үлкен байлығымыз. 1 мамыр мерекесі әрбір қазақстандыққа бірлік пен татулықтың маңызын еске салады. Ел болашағы – береке-бірлікте. Бірлігі бекем елдің болашағы да жарқын болмақ. Ендеше, бейбіт өмірдің бағасын білейік, бірліктің қадірін түсінейік. Себебі бейбітшілік – баянды бақыттың бастауы, ал бірлік – сол бақыттың мәңгілік кепілі.
Эльмира БАЙНАЗАРОВА