«Ұстаз жолы» кітабының ұлағаты мол
Ардагер ұстаз, республикалық, облыстық, аудандық газеттерде тілші қызметін атқарған Ниязхан Бейсеновтің жаңа кітабы оқырманға жол тартты. Онда Ниязхан Тоқтамысұлы өмірінің бүгінге дейінгі жолында көрген-білгендерін айтып, әр жағдаяттан түйген ойын жеткізіп, қалың жұртшылыққа пайдасы тиер ой қалдырған.
Мұғалім, кітапханашы, баспасөз хатшысы да болып қызмет етіп, бүгінде ардагерлер кеңесінің белсенді мүшесі ретінде қоғамның игілігіне еңбектеніп жүрген Ниязхан Бейсенов бұл кітабында әр жылдары баспасөз бетінде жарияланған мақалалары мен ұрпағының әкесіне, атасына деген ізгі тілектерін де топтастырған.
– Байзақ ауданының Ақжар ауылында бар ғұмырын бала тәрбиелеуге арнаған, ауыл халқының алғысына бөленген ардақты ұстаз өзі де үздік оқушы атанған. Мектепті бітіргеннен соң ауылда шопан, кітапханашы болып әр салада жұмыс істейді. Білімді өмірінің негізгі тірегі деп білген Ниязхан атамыз 1963 жылы Шымкент Мемлекеттік педагогикалық институтының филология факультетіне оқуға түсіп, қазақ тілі мен әдебиеті пәнінің маманы болып 1967 жылы бітіріп шығады. Ол кезде дипломмен елге оралған мамандарды оқу бөлімі қажетті ауылға жіберіп отыру заңдылығы болғаны белгілі. Сондықтан да Ниязхан Тоқтамысұлын Амангелді орта мектебіне қазақ тілі мен әдебиеті пәнінің мұғалімі етіп жібереді. Болмысынан адалдық, жауапкершілік, шыншылдықты басты қағида етіп ұстаған жан аталған мектепте жақсы қырынан көрініп, үздік мұғалім атанып, мектеп директорының орынбасары болды. Бұл мектепте 1982 жылға дейін еңбек етіп, Түймекент мектебіне отбасылық жағдаймен ауысып, бала оқыту ілімін жалғастырған. Ниязхан атамыздан дәріс алған шәкірттері бүгінде еліміздің әр аймағында қалап алған мамандықтарын дөңгелетіп, ел экономикасының дамуына зор үлестерін қосып жүр. Ниязхан атамыз 2003 жылы құрметті зейнетке шықса да қоғамдық жұмыстарға белсене араласып, ауылдың ақ самайлы ардақты қариясына айналды. Ниязхан атамыздың білім саласында жылдар бойы табанды еткен еңбегі еш қалған жоқ. «Жамбыл облысының еңбек сіңірген қайраткері» төсбелгісі, Қазақстан Республикасы оқуағарту министрлігінің Алғыс хаты, Байзақ ауданының Құрметті ардагері және де көптеген республикалық және облыстық деңгейде берілген марапаттардың иесі. «Қарты бар ауылдың қазынасы бар» демекші, елдің ұйытқысы, көненің көзі болып жүрген ұлағатты ұстаз әлі де қоғамдық жұмыстарға белсене араласып, белсенділік танытып жүр.
«Ұстаз жолы» берер өсиеттен оқырман құр қалмас деген ниеттеміз.
Қамар ҚАРАСАЕВА
Байзақ ауданы