Көркем шығарманы қалай оқығанды қалайсыз?
Ғылым адамзат игілігіне қызмет етсе ғана пайдалы әрі нәтижелі болары белгілі. Ал игіліктің бәрі де тәлімдік білім алудан басталса керек. Өмірдің сан қырын ұғындырып, түрлі жағдаяттардан дұрыс жол табуды үйретіп, адами қасиеттерге жетелейтін көркем шығармаларды оқыту білім алудың басында тұрады десек, қателеспейміз. Көркем шығарманы қызықтыра оқытудың тиімді тәсілдерін М.Х.Дулати атындағы Тараз университетінің қазақ тілі мен әдебиеті пәнінің мұғалімі мамандығында оқитын студент Арсұлтан Әлімқұлов зерттеп жүр. Ол «Көркем шығарманы талдау технологиясының педагогикалық-психологиялық жүйесі» тақырыбында зерттеу жүргізіп, тың тәсілдерді «125 High School» мектебінің оқушыларын оқыту барысында тиімділігіне көз жеткізіпті.
Университетте оқып жүріп, алған білімін мектеп оқушыларымен бөліскен ол 2024-2025 жылдары «125 High School» мектебінде қазақ тілі мен әдебиеті пәнінің мұғалімі ретінде өзі зерттеген тәсілдерді пайдаланып көрген.
Зерттеушінің айтуынша, көркем шығарманы талдау технологиясының педагогикалықпсихологиялық жүйесі оқушыларға оны толықтай түсініп, туынды арқылы айтылар ойды игеріп, берер тәлімін меңгеруге көмектеседі.
Оның зерттеу барысында түйген ойынша, көркемшығарманың психологияны қалыптастыратын ықпалы өз деңгейінде жүзеге асуы үшін әдеби туындыны оқырманның жасына қарай таңдай білу керек. Бұл жөнінде педагогика ғылымдарының кандидаты Береке Жұмақаева «Қазақ әдебиетін оқыту әдістемесі» оқулығында тереңірек тоқталған. Қайткенде де мұғалімнің негізгі мақсаты – алдындағы оқушыларына білім бере отырып, бойына адами қасиеттерді сіңіру. Осы жолда нәтиже берер әдіс-тәсілдерді іздеген педагог-ғалымдар аз емес. Солардың қатарын жастар да толықтырып отырғаны қуантады.
Қамар ҚАРАСАЕВА