Тараздық жас ғалым принтермен үй салу технологиясын ойлап тапты
Бүгінде қалдықтарды кәдеге жарату өзекті болып отыр. Осы мәселенің шешілуіне үлкен үлес қосатын жаңалықты тараздық жас ғалым Жандос Ескермесов қолға алды. Оның 3D-принтинг арқылы үй салу технологиясы қол еңбегін көп қажет етпейтіндігімен тиімді әрі тұрғындар үшін де үйдің беріктігімен сенімді болмақ.
Өндірістік қалдықтарды қайта өңдеп, оларды 3D-бетонның құрамына енгізу арқылы үй салу – Қазақстанда алғаш рет жүйелі зерттеліп жатқан еңбек. Құрылыс саласына тың жаңалық енгізіп отырған ғалым Ғылым және жоғары білім министрлігінің «Жас ғалым» жобасы аясында 29,7 миллион теңге көлемінде грант жеңіп алып, жаңа технологияны ғылыми тұрғыда дәлелдеп, жүзеге асырып отыр.
Оның жобасына «BM Partners 3D PRINT» компаниясы үлкен қызығушылық танытыпты. Әсіресе металлургиялық қалдықтар мен резеңке қоспасын 3D-бетонға енгізу идеясы олар үшін жаңашыл әрі өзекті болған. Сарапшылар бұл бағыттың экологиялық және технологиялық болашағы зор екенін айтып, бірлескен сынақтар мен зерттеулерге ынтамен кіріскен. Тың жобаны тудырған жас ізденуші өзі қызмет ететін Қазақ ұлттық су шаруашылығы және ирригация университеті жобаның дамуына жоғары деңгейде қолдау көрсетіп отыр екен. Университет ректоры Кәмшат Түсіпова ғылыми бағытты нақтылауда үлкен қолдау білдірген. Сонымен қатар зертханалық база, құрал-жабдықтар, сынақ орталықтары зерттеудің сапасына өз ықпалын тигізген. Жас ғалымдарға ғылыми іссапар, халықаралық байланыс, материалдық ресурстар бойынша да қолдау көрсетіліпті. Бұл технологияның тағы бір игілігі – құрылыс құнын 20-40 пайыз төмендетуге мүмкіндік беретіндігі.
Бұл технологияның отандық құрылыс индустриясын экологиялық және экономикалық тұрғыда жаңа деңгейге шығаратын нақты ғылыми жоба боларына сенеміз.
Қамар ҚАРАСАЕВА