«Тараз» келер жылы премьер-лигада ойын көрсете ала ма?

Қазақстан чемпионатында «Тараз» футбол клубы бір кездері супер-лигада, енді бірде премьер-лигада әртүрлі нәтижелерге қол жеткізіп жүрді. Тіпті премьер-лигадан шығып қалып, бірінші лигада өзінің мықты екендігін дәлелдеп, премьер-лигаға қайта оралған кездері де аз болған жоқ. Ел чемпионатындағы үздік шабуылшылардың бірі болған марқұм Олег Литвиненко жасыл алаңда қай кезде де кәсібилігімен дараланған еді. Бұдан бөлек ел чемпионатында 142 гол соққан Нұркен Мәзбаев, қарсыластардың қақпасын 131 мәрте дәл көздеген Мұрат Тілешев секілді сұрмерген ойыншылардың да есімдері клуб тарихында алтын әріптермен жазылды. «Тараз» футбол клубының президенті болып тағайындалған Дидар Сыдықбектің айтуынша, ендігі жерде клубтың жеңісті жорығын жалғастыру мақсатында стратегиялық шешімдер қабылдап, толайым табыстарға жету көзделіп отыр. Өңірлік коммуникациялар қызметінің баспасөз-брифингінде клуб басшысы даңқты түлектердің туған жеріне оралуына бар жағдай жасалатынын атап өтті.