Шариғатта ата-ананың разылығын алу маңызды
Асыл дініміз исламда әділдік, туралық, құрмет жағына өте көп маңыз берілген. Оны дін өкілдері – имамдарымыз айтудай-ақ айтып, жеткізудей-ақ жеткізіп келеді. Қазіргі таңда отбасы құндылықтары, әке мен ұлдың, анасы мен қызының арасындағы байланыс күрделеніп, көптеген отбасында жанжал туып, реніштер орын алып жатқаны да жасырын емес. Оның барлығы дін туралы хабарымыздың аздығынан болып жататын сияқты.
Дін өкілдерінің айтуынша, шариғатта ата-ананы құрметтеу өте жоғары орында тұрады. Қасиетті Құранда: «Ата-ананың разылығын алу – Алланың разылығын алумен тең» деп те айтылады. Яғни, жақсылық жасау деген ізгі амал екенін білеміз. Ал ардақты ата-анаға қамқорлық көрсету, оларды қуанту – шексіз сауап. Іс жүзінде қалай? Сені өмірге әкелген, өсірген, тәрбиелеген кісілерге ауыр сөз айтып, көңілін қалдырудан арланбаймыз.
Жуырда жұма намаздың насихатында облыстық «Һибатулла Тарази» мешітінің найб-имамы, медресенің білікті ұстазы Нұралы Бақытұлы отбасындағы жағдайлар, ұл мен қыздың ата-ана алдындағы парызы мен қарызы туралы кеңінен айтты. Жай ортада айтылған сөз басқа да, мешіттің мінберінде айтылған сөз бөлек екен. Сол насихат сөз жүрегі бар адамның жүрегін жібітті деп ойлаймын. Соншама толғанып, әкенің салмағын, ананың қасиетін айтып ой қозғағанда өн бойымызды оттай күйдіріп, төбе құйқамызды шымырлатты.
Бұл насихат маған да керемет ой салды. Менің анам да, әкем де арғы әлемде. Әкемнің және анамның көзін көрген көнелер бар. Сол кісілерге үнемі болмаса да хабарласып, жағдайларын біліп, еркелетіп, жылы сөзімді айтып тұрамын. Нұралы имамның сөзінен кейін де сол кісілерді іздеп, екі-үшеуінің хабарын біліп, жақсылыққа ұмтылғаным бар. Ата-анаңыз бар ма? Сыйлаңыз, құрметтеңіз. Шариғаттың сізге қояр талабы да осы.
Есет ДОСАЛЫ