Тексерулерді жүргізу тәртібі мен мерзімдері

Қазақстан Республикасының «Салықтар және бюджетке төленетін басқа да міндетті төлемдер туралы» Кодексінің 155-бабына сәйкес, салықтық тексеру жүргізу кезінде салық органдарының лауазымды адамдары төмендегідей құқықтарға ие:

1. Екінші деңгейдегі банктер мен қаржы ұйымдарынан тексерілетін тұлғаның шоттары туралы, сондай-ақ Қазақстан Республикасының заңнамасына сәйкес банк құпиясын қамтитын ақша қаражаттарының қозғалысы жөніндегі мәліметтерді сұратуға және алуға;

2. Мемлекеттік органдардан тексеру жүргізу үшін қажетті құжаттар мен мәліметтерді, соның ішінде коммерциялық, банктік және салықтық құпияны қамтитын ақпаратты алуға;

3. Бухгалтерлік және өзге де есеп құжаттамасын қағаз және электрондық түрде талап етуге, сондай-ақ тексеру тақырыбы шегінде ақпараттық жүйелерге қол жеткізуге;

4. Тексеру барысында туындаған мәселелер бойынша салық төлеушіден және оның қызметкерлерінен жазбаша түсініктемелер сұратуға;

5. Тексеру жүргізуге байланысты мәселелер бойынша шетел мемлекеттерінің мемлекеттік және өзге де органдарына сұрау салуға;

6. Бухгалтерлік және салықтық ақпаратты қамтитын пайдаланылатын бағдарламалық қамтамасыз ету мен ақпараттық жүйелер деректерін қарауға қол жеткізуді талап етуге (банктік құпия ретінде заңмен қорғалатын банк бағдарламаларынан басқа);

7. Салық салу объектісі болып табылатын мүлікті қарауға, түгендеу жүргізуге (тұрғын үйжайлардан басқа), нақты деректерді тауар-көлік жүк құжаттарымен салыстыруға;

8. Салық кодексінде белгіленген тәртіппен салық салу объектілерін жанама әдіспен айқындауға;

9. Қазақстан Республикасының заңнамасында көзделген өзге де құқықтарды жүзеге асыруға.

Салық органы лауазымды адамдарының міндеттері

Сонымен қатар салықтық тексеру жүргізу кезінде салық органы лауазымды адамдары төмендегідей міндеттерді орындауға тиіс:

1. Салық төлеушінің құқықтары мен заңды мүдделерін сақтап, заңсыз әрекеттері немесе шешімдері арқылы зиян келтіруге жол бермеуге;

2. Алынған және жасалған барлық құжаттардың сақталуын қамтамасыз етуге, оларды тексерілетін тұлғаның келісімінсіз жария етпеуге (заңда көзделген жағдайларды қоспағанда);

3. Қызметтік әдепті сақтауға;

4. Тексеру жүргізу кезінде салық төлеушіні оның құқықтары мен міндеттері туралы хабардар етуге;

5. Салық органы өкілдері ретінде өз өкілеттіктері мен міндеттерін түсіндіруге;

6. Салық төлеушінің белгіленген жұмыс тәртібін бұзбауға;

7. Салық төлеушінің талабы бойынша тексеру жүргізу тәртібіне қатысты Кодекс ережелерін түсіндіруге;

8. Тексеру жүргізу кезінде тексеру туралы тапсырманы және қызметтік куәліктерін көрсетуге;

9. Қазақстан Республикасының Салық кодексінде көзделген өзге де міндеттерді орындауға.

Талғат ПАРМАНОВ

облыс бойынша Мемлекеттік кірістер департаментінің Аудит басқармасының басшысы