10 мың үйді электр энергиясымен қамтып отыр
Облысымызда күн, су және жел электр стансалары толық қуатында жұмыс істеп тұр. Соның бірі – Жамбыл ауданына қарасты Қызылтаң ауылы маңында орналасқан «Айша күн шуақ» стансасы. Қазір онда 50 мегаватт электр қуаты өндірілуде.
Бүгінгі таңда республика да өндірілетін электр қуатының 21 пайызы біздің облысқа тиесілі. Жуалы ауданындағы «Бурное солар» күн электр стансаларынан кейінгі үлкен күн электр стансасы «Айша күн шуақ» стансасы. Бұл стансаның құрылыс жұмысын украиналық «Родина» ЖШС жүргізген болатын. 110 гектар аумақты алып жатқан стансаға 100 мың күн панелі орналастырылған. Треккерлер жүйесі арқылы панельдер күн шығуына қарай қозғалып отырады. Бұл панельдердің бір артықшылығы екі жағынан да жұмыс істейді.
Мәселен, қыс ауасында жерге түскен қардың күнге шағылысқан сәулесі арқылы да панель энергия қабылдауға қауқарлы. Бұл панельдер Ресей мен Қытайда шығарылған. Стансаның басшысы Жандос Райбекұлының айтуынша, 50 мегаватты құрайтын күн электр стансасы 300 гектар аумақты алып отыр. Алда оны 100 мегаватқа жеткізу жоспарланған. Бүгінде онда 15 адам еңбек етуде.
Бұл стансаның құрылыс жұмысының жобалық құны 20,8 миллиард теңгені құрайды. Күніне 50 мегаватт электр қуаты өндіріліп, «KEGOK» акционерлік қоғамының біртұтас энергия жүйесіне берілуде. Мұнда өндірілген қуат көзі 10 мыңнан аса үй мен өндіріс ошақтарын электрмен қамтуда. Станса айналасын станса жұмысшылары тазалап отырады. Ол үшін арнайы шөп оратын техникасы бар. Панельдерді шаң-тозаңнан сүртіп тазалау да жұмысшылардың міндеті.
Марат ҚҰЛИБАЕВ
Жамбыл ауданы