Бала қауіпсіздігіне ең алдымен ата-ана жауапты – Сәлемов
Жамбыл облысында кәмелетке толмағандардың еңбегін заңсыз пайдалану мәселесі талқыланған кезекті комиссия отырысы өтті, деп хабарлайды aqjolgazet.kz
Жиында жасөспірімдердің құқықтарын қорғау, олардың қауіпсіздігін қамтамасыз ету және түнгі уақытта жұмыс істеуге тартуға қатысты заң талаптарының сақталуы мәселелері көтерілді.
Жамбыл облысы әкімінің орынбасары Серік Сәлемовтың айтуынша, түнгі уақытта жұмыс істейтін кәмелетке толмағандардың басым бөлігі – студенттер, алайда олардың арасында мектеп оқушылары да бар.
Көбінесе жасөспірімдер кәсіпкерлік нысандарында даяшы болып жұмыс істейді. Балалардың еңбек етуге деген талпынысы болғанымен, барлық жұмыс берушілер Еңбек кодексінің талаптарын орындай бермейді.
Отырыс қорытындысы бойынша уәкілетті органдарға түсіндіру жұмыстарын күшейту, тексеріс жүргізу және кәмелетке толмағандарды түнгі еңбекке тартудың алдын алу бойынша нақты шаралар қабылдау тапсырылды.
Сонымен қатар комиссия ата-аналар мен жұмыс берушілердің жауапкершілігін арттыру арқылы жасөспірімдерді заңсыз жұмысқа тарту деректерін азайту қажеттігін баса айтты.