Самса сатудан басталған бизнес
Әрине, қатпарлы дәмді самсаның қамырын кез келген қазақ әйелі де дайындай алады. Десе де бір жесең аузыңда еритін шырынды қытырлақ самсаның құпия технологиясын «Пышка және Ко» деп аталатын тараздық жеке кәсіпкерлік біледі. Әр әйел самсаны әртүрлі жасаса да, көпке танымал бренд «Пышка» самса қамырын ерекше әрі бір ғана тәсілмен жасайды екен. Өз ісін сонау атақты көк базар аталып кеткен «Төлебай» базары кезінде бастаған Фархад Фазылов шағын ғана жерде өз қолынан пісірген самсаларын сатумен бастапты. Сөйткен ісі 2015 жылы жаңа атауға ие болып, жеке кәсіпкерлік ашады. Бүгінде «Пышка және Ко» компаниясы 100 адамды жұмыспен қамтып отыр. Бастапқыда самса қамырының бірнеше түрін жасаған олар бүгінде халыққа бірнеше тауар ұсынып отыр. Атап айтсақ, осы брендпен шұжықтар, кондитерлік өнімдер, мұздатылған жартылай дайын өнімдер шығарады. Жақын арада тағы да жүз шақты адамды жұмысқа аламыз деп отыр.
Ақылбекова көшесінде орналасқан цехқа барғанымызда мұнда 40 шақты жұмысшы жұмыс істеп жатыр екен. Әркім өз тірлігімен әлек. Бірі қамырды арнайы құрылғы арқылы жаюда. Екіншісі өлшеуде, үшіншісі қаптауда. Әйтеуір көз ілеспес жылдамдықпен әрекет етуде. Түсінгеніміз, цех екі аумақта орналасқан. Біз барған цехта қамырмен жұмыс жасайды. Яғни самса қамырын өндіріп, кептіріп, мұздатып, дүкендерге жөнелтеді. Ал екінші цехта тек кондитерлік тәтті өнімдер шығарылады екен. Екі цехты екі адам басқаруда. Бәрі де туыстар. Бауырлардан құралған серіктестер жұмыла жұдырық болып компанияның дамуына жағдай жасап отыр екен.
Германиядан алынған немістің «Фритч» атты қамыр жаятын екі құрылғысын әрқайсысын 18 миллион теңгеге сатып алыпты. Құрылғымен екі жігіт қамыр жайып тұр. 10 килограмм болатын ауыр қамырды көтеріп, аппаратпен жаюға да күш керек екен. Азат Мамбетқұловтың мұнда жұмыс істеп жүргеніне жыл толыпты. Міндеті – осы құрылғымен қамыр жаю.
Жоғары сортты ұн Павлодардан әкелінеді екен. Бір шетте қаптаумен айналысып отырған әйелдермен сөйлестік.
Компания осы уақытқа дейін жеңілдетілген несие немесе грант алып көрмепті. Бар тапқан ақшаларын ұқсатып жаратып, игілікті іске салыпты. Соңында осы кәсібінен нәсіп көріп отыр. Осы жылдан бастап өзге де мемлекеттерге саудаласақ деп жоспарлап отыр екен. 2023 жылы «Қазақстанның үздік тауары» қатарына енген «Пышка және Ко» компаниясы нәзікжандылардың сүйіктісіне айналған. Себебі қатпарлы самса қамыры қыз-келіншектердің ас үйдегі тірлігін жеңілдетті. Әп-сәтте үлбіреген жұмсақ самсаны «Пышкамен» бірге дайындау да бір бақыт дейтіндердің бірі Жұлдыз Әуелбекова.
Адам ба ласы өзінің жолын, бойындағы мүмкіншіліктерін, қабілетін дұрыс пайдалана білсе, алмайтын қамалы жоқ екен. Аспаздықты жанына серік еткен Фархат Фазыловтың еңбегі орасан. Самса сатып бастаған ісі үлкен компания құруға дейін жеткізді. Арманы алдамады. Бүгінде ол мешіттердің құрылысына көмектесіп, қайырымдылық істермен айналысады екен. Нарықта өзіндік орны бар компания ел экономикасына да пайдасын тигізіп отыр.
«Егенек болмаса, есік тұра ма, еңбек болмаса несіп тұра ма?» дейді халық мәтелі. Әр адамның өзіндік ризығы бар. Еңбек еткенде ғана сол ризық тұрақтанады екен. Компанияның әрбір жұмысшы алдында алып отырған жауапкершілігі бар. Және күллі Қазақстанды таза әрі адал өніммен қуанта берсек деген тілегі бар екен. Мақсаты да сол.
Бүгінде «Пышканың» круассандары, торттары, тәтті бәліштері, қатпарлы самса мен чебурек дайын қамырлары көптің көңілінен шығуда. «Пышканың» құпия тәсілімен екінші цехтың басшысы Диера Акрамқызы бөлісті.
Бәсекелестіктен қорықпайтын компания жақын күндері дайын фарш өнімдерін жарыққа шығарды. Онымен қоса шұжықтарды да жаңа өнім түрлеріне қосты. Әйелдердің алтын уақытын үнемдеуде таптырмас шешім болған «Пышка және Ко» компаниясы әлі де тың идеяларды жүзеге асырамыз деп отыр. 2021 жылы аталған кәсіпорын халал өнімдерді өндіруге, өңдеуге, дайындауға, сақтауға, тасымалдауға және сатуға қойылатын жалпы талаптар стандартына сай деп танылды.
«Көпшіліктің игілігіне жұмыс істеу – дұрыс ұстаным» деген екен Альберт Швейцер. Ал көне қытайлықтар «Раушан гүлін берген қолда оның хош иісі қалады» деп тұспалдаған. Берекелі өмір сүрудің құпиясы – табысқа жетуге ұмтылу емес, өзгелерді де бақытты етіп, өз болмысыңды түсіну екен. Тараздықтарды жұмыспен қамтып, ел игілігіне қызмет етіп отырған бауырларға алғыс айтып, сәттілік тіледік!
Эльмира БАЙНАЗАРОВА