Аяқ киімді тапсырыс берушінің талғамына қарай тігеді
Жеңіл өнеркəсіп саласы облысымызда баяу дамуда. Бар болған күнде де жұмыс істеп тұрған өндіріс ошағы саусақпен санарлық. Соның бірі – өткен ғасырдың алпысыншы жылдары құрылған «ТаразКожОбувь» жауапкершілігі шектеулі серіктестігі. Бүгінде өндіріс ошағының жұмысы қайта жанданып, жолға қойылып, жүздеген адамды тұрақты жұмыспен қамтып отыр.
Серіктестіктің алдына қойған мақсаты мен жоспары да көп. Зауыт директоры Еркін Абдыбаевтың айтуынша, алдағы уақытта өндіріс қуатын 30 пайызға арттыру көзделіп отыр. Яғни, өндірілетін аяқ киім көлемін 220 мың жұпқа жеткізу. Сонымен қатар күнделікті аяқ киімді өндіру мен сату көлемін жылына 30 мың жұпқа дейін ұлғайту. Әйелдер, жасөспірімдер және балалар аяқ киімінің ассортиментін кеңейту. Осылайша, қарапайым аяқ киім үлгісін сату үлесін 20 пайызға жеткізу межесі қойылған.
Өндіріс ошағы бүгінде бірқатар жетістіктерге де қол жеткізуде. Атап айтқанда, кәсіпорын жұмысшылары аяқ киімнің салмағын азайтуға мүмкіндік беретін стробты қатайту әдісін меңгерген. «ПУ/нитрил» табаны бар әскери етік сияқты аяқ киімнің жаңа үлгілерін шығаруды жолға қоюға мүмкіндік туған. Сонымен қатар ерлер, әйелдер, жасөспірімдер және балалар күнделікті аяқ киім үлгілерінің ассортиментін ұлғайтқан. Зауыт директорының айтуынша, серіктестік бұрынғы «Джамбулкожобувь» өндірістік бірлестігі негізінде 2002 жылы қайта құрылған. Оның негізі 1961 жылы қаланып, КСРО-ның былғары және аяқ киім өнеркәсібіндегі ірі кәсіпорындардың бірі болған еді. Кешеннің өндірістік қуаты жылына 500 мың жұп аяқ киімді құрайды.
Бүгінгі таңда серіктестік Қазақстандағы былғары аяқ киім шығаратын ірі отандық өндіруші. Кәсіпорын құқық қорғау органдарына арналған аяқ киім, жұмыс және күнделікті аяқ киімдер шығаруға маманданған. Аяқ киімнің ассортименті 80-нен астам модельді құрайды. Бүгінде зауытта 250-ге жуық адам жұмыспен қамтылған. Серіктестіктің ерекшелігі – өндірісті кез келген тапсырыс берушінің талғамына қарай бейімдей алады. Ол үшін барлық зауыттың қажетті техникалық және шикізат базасы жасақталған. Аяқ киім фабрикасы брезентті жұмыс аяқ киімін шығаратын цехтардан, хромнан жасалған ерлер аяқ киімін тігетін аяқ киім шеберханасынан, аяқ киім шығаруға дайындық цехтарынан тұрады.
Австрия, Чехия және Италияда жасалған заманауи технологиялық жабдықтармен жабдықталған. Аяқ киім фабрикасы армияға, құқық қорғау органдарына, күзет және құтқару қызметтеріне, әртүрлі өндірістік және өндірістік кәсіпорындардың жұмысшыларына арналған тырнақты және инъекциялық әдіспен бекіту аяқ киімі шығарылуда.
Өндіріс ошағында кәсіподақ ұйымы құрылған. Оған Марина Тазабаева төрағалық етеді.
Марат ҚҰЛИБАЕВ
Тараз қаласы