Таразда үздік оқырмандар марапатталды
Тараз қаласындағы Д.А.Қонаев атындағы балалар мен жасөспірімдер кітапханасында «Кітап оқы – арманға ұмтыл!» атты үздік оқырмандарды марапаттау кеші өтті, деп хабарлайды aqjolgazet.kz
Шара «Әулиеата – кітап оқитын өңір» акциясы аясында ұйымдастырылып, оқырмандардың кітапқа деген қызығушылығын арттыру мен оқу мәдениетін қалыптастыруды мақсат етті.
Іс-шарада жыл басынан бері ең көп кітап оқыған оқырмандар марапатталып, өз ой-пікірлерін және әсерлерін бөлісті.
Жыл үздіктері қатарында Дулат Қасымов, Жібек Бекжанқызы, Алинұр Әбсат және Айзере Серік ынталандыру сыйлығына ие болды. Ал Нұрсұлтан Жаңабай мен Айзере Шәмен – «Зерделі жас», Ақерке Қали мен Айлин Болат – «Кітапхананың мақтанышы» атанды. Ең көп кітап оқыған Айша Рахымберді «Жыл оқырманы» номинациясымен марапатталып, бас жүлдені иеленді.
Кешке журналист, сатирик-ақын Бақытжан Советұлы, журналист, балалар жазушысы Марат Құлибайұлы, филолог, журналист Мырза-Ғали Эльмира, сондай-ақ облыстық «Aq jol» газетінің аға тілшісі Қамар Қарасаева қатысты.
Шара барысында «Ерке» ЖК-нің домбыра үйірмесі ұлттық күйлер орындап, «SMART» ЖК би үйірмесі қазақтың «Аманат» және түрік халқының «Байрам» билерін ұсынды. Сонымен қатар, көрермендер назарына арнайы кітап көрмесі ұсынылды.