Президент қазақстандық боксшыларды құттықтады
Бұл туралы Ақорданың баспасөз қызметі мәлімдеді, деп хабарлайды aqjolgazet.kz
«Мемлекет басшысы Қасым-Жомарт Тоқаев Санжар Тәшкенбай мен Махмұд Сабырханды бокстан Әлем чемпионы атануымен, сондай-ақ Назым Қызайбайды күміс жүлде, Виктория Графеева мен Елдана Тәліпованы қола жүлде иеленуімен құттықтады.
Президент спортшыларымыздың алдағы финалдық жекпе-жектеріне сәттілік тіледі», – делінген ресми хабарламада.
Сондай-ақ, Мемлекет басшысы бірқатар чемпионат жеңімпаздарын да араға ұзақ уақыт салмай Instagram парақшасында да құттықтады.
«Ливерпульде өткен бокстан Әлем чемпионатында ұлттық құраманың жеңіс жолын Алуа Балқыбекова, Аида Әбікеева, Төрехан Сабырхан, Наталья Богданова, Айбек Оралбай жалғастырды. Қазақ боксшылары әлем біріншілігінде керемет нәтиже көрсетті. Әйтсе де алдымызда АҚШ-та өтетін Олимпиада ойындары күтіп тұр. Соған қазірден бастап дайындалу қажет. Қазақ бокс мектебінің мерейі әрдайым үстем болсын!» – деп жазды Президент Instagram парақшасында.