Сатириктің сан қыры
Қазақ әдебиетінің сатира жанрына сүбелі үлес қосқан қаламгердің шоқтығы биігі – Шона Смаханұлы. Сатираның саңлағы 1942 жылы байзақтық Тайғара Наржанов деген кісімен Жамбыл қаласында (қазіргі Тараз) мұғалімдік курста бірге оқыпты. Содан араларында достық болса керек. Кейіннен Шона Алматыға қоныс аударып, әйгілі ақынға айналып кеткен кезінде де елдегі досын бір сәт есінен шығармай, хабарласып тұрыпты.
Тіпті, беріректе 1984 жылы Қырықжылдық (қазіргі Мәдімар) ауылына Тайғара Наржановты арнайы іздеп барып, досының отбасында болған. Ол кезде Тайғара – ұжымшар бастығы екен. Сатирик Шона Смаханұлы досымен әзілдесіп, әртүрлі кейіпте суретке түсуді де ұмытпапты. Екі достың қуана кездескен шағы қандай әсерлі десеңізші! Қазіргі таңда жоғарыда аталған екі дос та бақилық. Олардың жүздескен сәттері – тарих. Бұл туралы Тайғараның баласы Төле Наржановта деректер мен суреттер сақталған екен.
Сатира сардарына айналған Шона ақынның Байзақ ауданы, қазіргі Мәдімар ауылына келуі, суретке түсуі – бір құндылық. Оны ұзақ жыл сақтап келген Төле Наржановтың ұқыптылығын да оң бағалауға болады.
Есет ДОСАЛЫ
Байзақ ауданы