Бала кезден арман болған ––– Астана
«Aulieata-media» холдингіне яғни, осы серіктестікке қарасты басылымдар талай тілшіге қанат байлап, арманына жол ашқан, үлкен соқпаққа салған іргетасы, мықты, құтты қара шаңырақ. Осы газеттерден республикалық басылымдарға ауысып, елордамыз Астанаға қоныс тепкендер жас қалаға барып үйлі болып, қызметте көтеріліп, жетістіктерге жетіп жатыр.
Солардың бірі – Жасұлан Сейілхан. Жазған мақалалары мірдің оғындай Жасұлан бас қалаға бара салып, ел газеті «Егемен Қазақстанға» қызметке тұрды. Саясат және құқық бөлімінің аға тілшісі. Ақорда, Үкімет, Парламент, Сыртқы істер министрлігінің пулындағы журналист. Жұбайы Нұрбану Бердімбетова №7 Астана қалалық емханасында эндокринолог дәрігер. Әзірге редакцияның жатақханасында тұрады. Биыл үшінші жыл қатарынан Мемлекет басшысының қолдауымен елордалық журналисттер үйлі болуда. Соның ішінде егемендіктер жыл сайын пәтерлі болып жатыр. Жасұлан да өз кезегінде баспаналы болатынына сенімді.
Келесі кейіпкеріміз – еңбек жолын Жамбыл жерінен бастап, бүгінде бағаналы ордадағы «Astana aqshamy» газетінің тілшісі атанған дүлдүл ақын Шапағат Әбдір. Мақаланың майын тамызатын Шапағаттың жазғандары астаналықтардың көңілінен шығыпты. Қызба ақын бұл күндері поэзиямен қатар жас та болса бас қаланың түйткілді тіршілігі жайлы мақалалар жазып жүр. Шапағат «Алтын тобылғы» әдеби сыйлығының лауреаты. Ол – «Алдай көрме сен мені» жыр жинағының авторы. «Менің ұлтым – әдебиет, руым – поэзия» дейтін ақын Шапағат әлеуметтік желілерде де белсенді.
Иә, Астана – баршамыз үшін бөтен емес. Бетке ұстар бетпердеміз, әрі-беріден соң болашақтың қаласы деп дәріптейтін жұмақ мекеніміз! Мерекеңмен, Астана!
Эльмира БАЙНАЗАРОВА