Бүгінгі заманның журналистері қандай болуы керек
28 маусым – бұқаралық ақпарат құралдары қызметкерлері күніне орай іс-шаралар легі жалғасып жатыр. Amanat партиясы облыстық филиалы мәжіліс залында Қазақстан Журналистер одағы мен республикалық салалық кәсіподағы облыстық филиалдары және облыстық жастар ресурстық орталығы бірлесіп, БАҚ өкілдерімен кездесу өткізді.
Жиынды Қазақстан Журналистер одағы облыстық филиалының төрағасы Жаңабай Миллионов ашып, әріптестерін төл мерекесімен құттықтады.
Мұнан соң сөз алған республикалық салалық кәсіподағы облыстық филиалының төрағасы Дүйсенәлі Бықыбаев, облыстық Жастар ресурстық орталығының директоры Айбек Қадыралиев «арқалағаны алтын, жегені жантақ» журналистердің ауыр жұмыстарына тоқталып, жылы лебіздерін білдірді. Белгілі жазушы-журналист, Қазақстанның еңбек сіңірген қайраткері Көсемәлі Сәттібайұлы да алқалы жиында сөз алды.
Жиында халықаралық «Алаш» сыйлығының лауреаты Ғайни Әлімбекқызы, «Auliеata-Мedia» жауапкершілігі шектеулі серіктестігі бас директорының орынбасары Алпамыс Қазыбай, мемлекеттік қызмет пен қаламгерлікті қатар алып жүрген Майлыбай Смағұлов, облыстық «Руханият және тарихтану» орталығының бөлім басшысы Назым Қожамарова, облыстық «Jambyl TV»телеарнасының редакторы Шерхан Дәкен өз ойларын ортаға салды. Алпамыс Шәменұлы қазір жас журналистерге таңдау жоғары екенін, оларға көптеген заманауи мүмкіндіктер жасалғанын айтып өтті. Жиын барысында республикалық салалық кәсіподағы «Еңбек даңқы» медалімен журналистикаға ерен еңбегі сіңген майталмандар Көсемәлі Сәттібайұлын, Ғайни Әлімбекқызын және Эльмира Мырзағалиды марапаттады.
Бұдан бөлек бірқатар азаматтар «Еңбек ардагері» медалін иеленді. Облыстық жастар орталығы тағайындаған сыйлыққа облыстық «Jambyl TV» телеарнасының редакторы Шерхан Дәкен және облыстық «Аr-Aі» жастар газетінің тілшісі Ақтоты Жаңабай ие болды. Қазақстан Журналистер одағы облыстық филиалының сыйлықтары да бірқатар журналистерге бұйырып, 13 жас маманға «Қазақстан Журналистер одағының мүшесі» деген куәлік берілді. Ал мерейлі 75 жасқа толған Майлыбай Смағұлов Қазақстан Журналистер одағы төрағасының Құрмет грамотасымен марапаталды.
Есет ДОСАЛЫ