Жаңалықтар

Бір әкенің тәрбиесін жүз мектеп бере алмайды

The final spritzer

Шынында қазақта «Бір әкенің тәрбиесін жүз мектеп те бере алмайды» деген қанатты сөз бар. Отбасының іргесі берік болып, ұлттың ұлт болып ұйысуында әкелер институтының маңызы зор. Осы мақсатта елімізде 2023 жылдан бастап маусым айының үшінші жексенбісі әкелер күні ретінде аталып өтіледі. Айшықты дата қарсаңында ел аумағында отбасы құндылығын дәріптеу, қоғамдағы әкелер рөлін арттыру мақсатында түрлі мәдени іс-шаралар ұйымдастырылады.

Осыған орай Оқу ағарту министрлігінің қолдауымен және Ш.Мұртаза атындағы халықаралық Тараз инновациялық университетінің ұйымдастыруымен оқушылар арасында өткен «Менің әкем» республикалық шығармашылық байқауы өз мәресіне жетті. Байқауға еліміздің әртүрлі өңірінен 800-ге жуық шығармалар келіп түсіп, шын мықтылар анықталды. Аталмыш университет қабырғасында өткен жеңімпаздарды марапаттау рәсімінде оқу ордасының ректоры Махметғали Сарыбеков әкелер рөлінің отбасы құндылығы мен қоғам өмірінің татулығы мен тұрақтылығын қамтамасыз етудегі маңыздылығына тоқталып өтті.

Байқау қорытындысы бойынша өз әкелерінің өнегелі өмірін көпке үлгі етіп көрсете білген жастар іріктеліп алынды. Олардың қатарында өткен жылы 46 жасында жол апатынан қаза тапқан полицей қызметкері Ғалым Арыстанбаевтың ұлы Нұрболат Қазыбек те бар. 11 баланың әкесі, «100 жаңа есім» жобасының жеңімпазы, «Мерейлі отбасы» республикалық байқауының финалисі болған Ғалым Арыстанбаевтың ерлігі мен адамгершілігі туралы толғап, жүлделі үшінші орын иеленген Нұрболат Ғалымұлы әке жолын жалғау басты арманы екендігін жеткізді.

Байқау қорытындысы бойынша жүлделі үшінші орынды Нұрболат Қазыбектен бөлек, Шымкент қаласы №57 жалпы орта мектебінің 9-сынып оқушысы Дінмұхамед Сабден мен Қызылорда облысы, Арал ауданының тумасы Іңкәр Жеткергенова бөліске салса, екінші орынды Талас ауданы, Қолбасшы Қойгелді атындағы орта мектебінің 9-сынып оқушысы Шапағат Нұржанқызы иеленді. Сонымен қатар шығармашылық байқау нәтижесі бойынша бірінші орын тұғырынан қос бірдей жеңімпаз – қызылордалық Кәусар Райымбек пен Тараз қаласы Назарбаев зияткерлік мектебінің 10-сынып оқушысы Мерей Асамбай көрінді.

Бұдан бөлек, марапаттау рәсімінде бірқатар қатысушыларға арнайы жүлделер табысталды. Атап айтқанда, Тараз қаласы Ө.Жолдасбеков атындағы № 50 орта мектебінің 10-сынып оқушысы Аружан Бақтыбай мен Інжу Тілеулі Парламент Мәжілісінің депутаттары Ерболат Саурықов пен Ринат Зайытовтың арнайы жүлделерін иемденді.

Сонымен бірге қызылордалық Диана Рахымбай Мұхтар Мағауин атындағы, тараздық Ернұр Балтабай Дулат Исабеков атындағы, байзақтық Айзере Айтбек Шерхан Мұртаза атындағы арнайы жүлде иегерлері атанды. Бұдан өзге де қатысушыларға Алғыс хаттар мен ынталандыру сыйлықтары табысталып, сыйлыққа кітаптар берілді.

Жиын соңында облыстық мәслихат депутаты Оралхан Дәуіт жиылғандарды айшықты мерекесімен құттықтап, оқу орнының ректоры Махметғали Сарыбековке «Әкелер одағы» республикалық қоғамдық бірлестігінің төрағасы Мақсұтбек Айтмағанбеттің Алғыс хатын табыстады.

 

Нұрболат АМАНБЕК